<<Retour

Textes sur la châtellenie de Mareuil aux AD 64, proposés par M. Claude-Henri PIRAUD

  1. Enquête sur le péage de Pontarnaud (1473) (Arch. dép. Pyr. Atl., E.  840)
  2. Enquête des officiers du vicomte de Limoges (1409) (Arch. dép. des Pyr. atl., E.805)
  3. Lettres royaux de feudis exhibées par le Sgr de Mareuil (Arch. dép. Pyr. Atl., E.706)
  4. Procès verbal de vérification de la baronnie de Mareuil (20 mars 1545) (Arch. dép. Pyr. Atl., E.767)

 

ENQUETE SUR LE PEAGE DE PONTARNAUD (1473)

S’ensuit la depposition des tesmoings produitz de la partie de nobles & puissans Sgrs mesSgrs de Maruelh, touchant le peaige de la pouge de Pontarnaulx, à l’ancontre de tres hault & exellent Sgr monSgr le conte de Perigort à cause de sa seigneurie de Bordeilhe, lesquels tesmoings ont estés oys & escoutés par nous, Helie de Puysilhou, licencié en loix, juge dud. lieu de Bordeilhe, et Guillaume Faure, bacheller en droits, juge dud. lieu de Maruel, sur les articles à nous bailhés de la partie desd. Sgrs de Maruel, desquels la teneur ci-empres s’ensuyt. Auquel examen avons vacqué au lieu de Pontarnaulx par le commandement dud. monSgr le conte & de son consentement et aussi du consentement desd. de Maruel, le xxime jour du moys d’octobre l’an mil iiiic lxxiii. Lequel jour, de la partie desd. de Marueil nous furent amenés & produiz à tesmoings Ithier Jaubert, escuier, Pierre Jardon, Jehan Charles, Rampnoul de Villars, Helies Jardon, Guillon de Villars, Ithier Raimond, escuier, lesquels nous avons receu & fait jurer sur le Livre de dire & depposer verité, en la presence de noble homme Helie Panet, segneur de Romain, procureur de mond. Sgr le conte.

 

S’ensuit la teneur desd. articles. Entendent monstrer et prouver nobles et puissans Sgrs mesSgrs de Marueil à l’encontre de tres hault & tres exellent prince monSgr le comte de Perigort, à cause de sa Sgie de Bordeilhe, les faiz qui s’ensuyvent : //

Et premierement, disent lesd. Sgrs de Marueil (ont requis à cause) […] ilz (ont passés) …… …… prerogatives & …… et tous drois de justice & jurisdiction, haulte, moyenne & basse, mixte et impere.

ii. Item, entre autres, ilz ont droit de prendre, lever et recevoir ou de faire prendre & lever par autres en leur nom le droit de peaige de toutes et chacunes les marchandises passées et repassées par lad. chastellenie de Maruelh subjectes à droit de peaige.

iii. Item, et mesmement de lever ou faire lever, prendre et percevoir led. droit de peaige desd. marchandises, subjectes à iceluy peaige payer, qui sont passées et repassées et conduictes par le chemin encien vulgairement appellé “la Pouge de Pontarnaulx”.

iv. Item, & que dud. droit de peaige lesd. Sgrs de Maruel, & leurs predecesseurs Sgrs dud. lieu, ont joy & usé par x, xx, xxx, xl, l, lx, iiiixx, cent ans & plus et par tel & si long temps qu’il n’est memoire du contraire, au veu et sceu de mond. Sgr le conte, et ses predecesseurs Sgrs dud. lieu de Bordeilhe, les officiers dud. lieu & autres qui l’ont volu veoir & scavoir, paisiblement & sans nul contredit.

v. Item, il est vraysemblable que lesd. de Marueil doyvent jouyr de prendre & lever led. peaige des marchandises passées & repassées par lad. pouge, car icelle pouge est totallement assise en et audedans des fins …… de l’estendue de lad. chastellenie de Marueil ; // laquelle chastellenie s’estend d’icelluy cousté jusques au lieu appellé Les Trois Pierres, tirant d’icelles Trois Pierres le long d’un (v…… ou terier) retour d’icelles Trois Pierres passant le long de lad. pouge, icelle comprise en lad. chastellenie de Marueil, jusques à la croix appellée Foullerou, autrement de Jauvelle, lesquelles Trois Pierres, (terier ou v……) font divise des chastellenies dud. lieu de Marueil & de Bordeille.

vi. Item, et que par ce moyen n’est lieu ne proces à mond. Sgr le conte, sesd. gens, serviteurs & officiers ne autres quelsconques, de prendre ou lever led. peaige des marchandises conduytes et menées par lad. pouge ou chemin encien qui passe par led. lieu de Pontarnaulx …… l’estendue de lad. chastellenie de Marueil.

vii. Item, et pour les choses susd. vrayes, cleres, notoires & manifestées et d’icelles est voix & fame publicque esd. chastellenies de Marueil [&] de Bourdeilhe.

 

S’ensuyt la depposition desd. tesmoings.

viii. Ithier Jaubert, escuier, seigneur de la Mo(n)zie, natif & demorant aud. lieu de Marueil, & eagé de lxx ans ou environ, oy & examiné sur le contenu esd. articles, dit & deppose par son serment qu’il scet où est lad. pouge declarée esd. articles, qui passe par Pontarnaulx et pareilhement scet les Trois Pierres nommées en iceulx articles et scet que la chastellenie dud. lieu de Marueil s’estend jusques aud. Trois Pierres du // cousté dud. Bordeilhe et s’estend jusques à ung (terier ou v……) qui part desd. Trois Pierres et tire le long de lad. pouge jusques à la Croix de Jauvelle et passe le long de lad. pouge, laquelle pouge demoure ……che en lad. chastellenie de Mareuil. Dit oultre qu’il puet avoir xxv ans ou environ qu’il vit tenir (taxer) pour lesd. Sgrs de Mareuil ausd. Trois Pierres qui sont assises par led. v…… qui passe est le long de lad. pouge du cousté dud. Bordeilhe à feu maistre Aymery de Merle, seneschal ou juge de Marueil ; à laquelle (court) estoit ung nommé Barbu, procureur lors dud. lieu de Bordeilhe ; auquel, et aussi à feu Guillon Quentin & à plusieurs autres, il oyt dire que lad. chastellenie de Marueil s’estendoit jusques aud. v…… et que lad. pouge estoit en lad. chastellenie de Marueil ; dit aussi qu’il a tousiours veu joyr et user lesd. Sgrs de Marueil de prendre & lever lesd. drois de peaige en lad. pouge paisiblement & sans contredit au veu et sceu desd. officiers de Bordeille. Et (lesquels) a dit ……que puis ung an en ça …… qu’il a oy dire que mond. Sgr le conte ou sesd. officiers de Bordeilhe leur y faisoient debat, mes qu’il ne scet. Et plus n’en dit. //

Pierre Jardon, laboureur, natif et demorant de lad. paroisse de Vieilh Marueil, agé de iiiixx ans ou environ, dit & deppose par son serment que sur les Trois Pierres, (terier ou v……), pouge d’icelles & tirant à la Croix Foulheroux, dite de Jauvelle, …… scet la pouge declairée esd. articles ; et dit que toute sa vie et deppuis sa cognoissance il a veu joyr lesd. de Marueil de prendre & lever le peaige des marchandises passées en lad. pouge sans nul contredit. (Lesquels) a dit qu’il a oy dire puis ung an en ça que les officiers de Bordeilhe leur mectoient quelque debat. Dit qu’il puet avoir lxv ans ou environ que ung nommé Mondot Jardon, lors demorant à Monsec, afferma led. peaige du seigneur qui lors estoit de Marueil & en joyt et luy ……, pour abiller lad. pouge en certains lieux où il y avoit mauvaiz passaiges, y porte & fait pourter plusieurs tables & boys de sa maison, ainsi qu’il vit. Dit oultre qu’il scet que lesd. Trois Pierres sont assises sur le bord dud. v…… du cousté dud. Bordeilhe et fait divise des chastellenies de Marueil et de Bordeilhe. Et … moyen & aussi pour ce que lesd. de Marueil ont joy dud. peaige, croyt que lad. pouge est en la chastellenie de Marueil. Et plus n’en dit.

Helies Jardon, laboureur, natif et demorant de lad. paroisse de Vieilh Marueil, eagé de lxxv ans ou environ, dit & deppose par son serment que depuis sa cognoissance il a tousiours & continuellement veu joyr & user lesd. de Marueil de prendre & lever led. peaige en lad. pouge et ne scet jamaiz que nul leur y mist empechement ne que autre y levast ne demandast peaige fors eulx, sinon que puis ung an en ça il a oy dire que les officiers de Bordeilhe leur y metoyent empechement. Et plus n’en dit. //

Jehan Charles, laboureur, natif de Monsec, à present demorant à Montagrier, eagé de lx ans ou environ, dit & deppose par son serment qu’il scet que la justice, jurisdiction & chastellenie de Marueil s’estendent du cousté dud. Bordeilhe jusques ausd. Trois Pierres & tire à la Croix Foulheroux jusques à icelle. Et sont assis lesd. Trois Pierres et Croix sur le bord dud. terier du cousté dud. Bordeilhe. Et scet que led. v…… fait divise des chastellenies de Marueil et de Bordeilhe pour ce qu’il puet avoir xl ans ou environ, qu’il oyt dire ……ment à feu …… Roussi, homme encien de l’eage de iiiixx ans ou environ, lors demorant aud. lieu de Pontarnaulx, que toute sa vie il avoit veu joyr lesd. de Mareuil de prendre led. peaige en lad. pouge et que leurd. jurisdiction & chastellenie de Marueil s’estendoyent jusques aud. terier & comprenoient lad. pouge ; et semblablement l’oyt lors dire à feue Agnes de La Prade, femme dud. Roussi, & à feue Agnes de La Prade, seur de lad. Agnes et mere dud. qui parle. Dit aussi qu’il a veu tousiours joyr lesd. de Marueil sans nul contredit dud. peaige . Et n’a point sceu que personne leur y ait mis debat fors que aujourduy. Et plus n’en dit.

Rampnou de Villars, merchant, natif et demorant aud. lieu de Villars, et eagé de l ans ou environ, dit & deppose par son serment qu’il scet lesd. Trois Pierres et Croix Foulheroux sont assises sur le bord du v…… ou terier declairé esd. articles du cousté dud. Bordeilhe. Et scet que lesd. Pierres, Croix & terier font divise des chastellenies de Marueil et de Bordeilhe et que lad. chastellenie dud. lieu de Marueil s’estend jusques ausd. v……, Pierres & Croix & comprent lad. pouge. Et le scet pour ce que ainsi l’a oy tousiours // dire & tenir depuis sa cognoissance à plusieurs enciens hommes, à Berny de Villars, son pere, & à feu Guillon Quentin & autres dont n’est record. Dit aussi que jamais ne sceust que homme print droit de peaige en lad. pouge fors lesd. de Marueil, lesquels a tousiours veu joir de le prendre sans nul contredit jusques à puis ung an en ça qu’il a oy dire que les officiers de Bordeilhe y metent debat. Et plus n’en dit.

Guillon de Villars, laboureur, natif et demorant aud. lieu de Villars, et eagé de lxx ans ou environ, dit & deppose par son serment que en effet & sustance …… led. Rampnou de Villars, son nepveu, tesmoing precedent. Dit plus qu’il a oy dire et tenir les choses susd. à feu Guillon Botz, homme ancien eagé de iiiixx ans ou environ, et puet avoir xxx ans ou environ qu’il le luy oy dire premierement. Et plus n’en dit.

Ithier Raymond, escuier, Sr de (Botuers), natif & demorant à la presenteur …… Mareuil, eagé de l ans ou environ, dit & deppose par son serment qu’il scet lad. pousge, lesd. Trois Pierres, lad. Croix Foulheroux & lesd. v…… ou terier declairés esd. articles ; et scet que lesd. Pierres & Croix sont assises sur le bord dud. v…… du cousté dud. Bordeilhe. Et dit qu’il puet avoir dix ans environ qu’il vit tenir la (court) pour lesd. de Marueil ausd. Trois Pierres ; et puet avoir xxx ans ou environ, ung certain jour que luy qui parle (sieurs) Guillon Quentin & Naudin Debon, lors gens enciens de l’eage de iiiixx ans ou environ, estoient ensemble aud. lieu de Pontarnaulx, ausqueulx Quentin & Debon il oyt lors dire que la justice & chastellenie de Marueil s’estendoient jusques ausd. Trois Pierres, v…… & Croix et comprenoient lad. pouge. // Dit aussi que tousiours a veu joir lesd. de Mareuil de prendre & lever led. peaige en lad. pouge sans nul contredit jusques à puys ung an en ça. Et plus n’en dit.

(Arch. dép. Pyr. Atl., E.840)

ENQUETE DES OFFICIERS DU VICOMTE LIMOGES (1409)

contre l’ancien procureur et chancelier à Nontron, Laurent Panet [1], et Bernard son frère, et sur les usurpations de justice commises par le sire de Mareuil, notamment dans la succession de Simonet Franc (9 mars 1409, n.st.)

Ceste presente information fut faite par nous Guillaume [2] Basat et Pierres de Pueydillon, notaires et jurés de la vicomté de Lymoges, par le expres commandement et instruxion à nous faite de bouche par le noble et puyssant home Pierre de Perrien, dit Le Bedas, lieutenant, garde et gouverneur de la vicomté de Lymoges pour très excellent prince et seigneur, Olivier de Bretaigne, comte de Painthevre, vicomte de Lymoges, à l’encontre de Lourens Panet, procureur et chancellier dudit vicomte ; et fut commencée le … jour de … l’an mil iiiic et …, avec les tesmoigns qui se enssuyent.

…… …… …… …… …… …… de Saint-Pardouls de La Riviere, tesmoing juré, [dist] et par son serement deppousa que …… …… …… …… …… …… estoit à Nautron, à l’ostel de Giron Janerac, et ledit Lourens y estoit aussi …… …… …… …… gentilhome de Lymosin deivoit au chapitre de Saint-Lyenart onq… …… …… …… ledit gentilhome leur vendi lx sols de rente ; et que d’autres foys gom nis…… …… …… …… …… …… presente c sols et il les avoit scellé et en avoit heu x franx, lesquelx y …… …… ledit …… …… …… Monsgr, si come il disoit.

Jehan Hugon, de Javerlhac, tesmoing juré, dist et deppousa par son serement que ledit Lourens li dist : “Johanot, que …… …… …… de Lonlaria m’en done un escu et je li rendray ta lettre” ; et parloit d’une lettre qu’il leur avoit fait appointer ; et …… …… le lieutenant du juge avoit ourdené qu’il le leur rendist quar il ne y avoit nul droit ; et encorres leur de… …… …… Dist encores plus ledit qui parle que le chappellain de Javerlhac avoit aquis pour achapt un jardin ou sieur de Rochechuart (?) ; et ledit Laurens li a scellé en …… preiudice dudit vicomte et de l’homage en quoy il est tenu oudit vicomte de Lymoges ; dist encores plus que ledit Laurens avoit heu de Nadal de Javerlhac certaine some d’argent …… …… pour aucunes chouses don Hugot son fils avoit d’autres foys gaigé l’emende en la com… ……

Pierres Bertholmieu, de Chabanes, tesmoing juré, dist et par son serement deppousa que un home appellé …… Chabbant (?) …… …… qu’il avoit tant batu la fame de son fiulz qu’estoit grosse d’enffant, qu’elle s’estoit affollée et par viii jour ledit Laurens vint qui parla telles paroles en effieyt : “Periot, sces-tu si se pourroit prover ce que l’on dit de Chabbant ? “, lequel li respondit : “Ne say” ; et lors ledit Lourens dit : “S’il se vouleist, je (fice) tout casser, mes il ne pourroit riens tenir secret quar ces (gens) ne se puevent tenir de parler et ne scevent riens celer “ ; autre chouse n’en scet, par son serement …… …… …… parler de celuy fet.

Perrinet Fourien [3], tesmoing juré, dist et par son serement deppousa qu’il tient son vilage de Belussiere (?) en homage de monsgr le vicomte et que le sire de Marueil le vouloit atrere a fere leguer en son chastel de Maruel ; qu’il s’en ala plaindre a monsgr le lieutenant ; et ledit monsgr le lieutenant en charga audit Lourens qu’il le alast instruire … ; et ledit Lourens ampres deux jours ala à Marueil et à la requeste du sire de Marueil il fist une informacion omettant que ledit tesmoing avoit dit que sondit vilage movoit nu ains de monsgr le vicomte ; et en faisant …… ledit Lourens manda ledit tesmoing pour un home appellé Peir de Vertempnhac [4] qu’il alast parler à luy …… …… et quand il fu à Marueil (apoines), ledit Lourens voulu parler ou luy mes toutes foys li dit : “ Je ferai une informacion contre vous “ ; et lors ledit Perrinet li respondi : “Par Nostre Dame, mes le faicte bien cont… ……“ ; et ledit tesmoing ouy dire à Marueil que le sire de Marueil li avoit doné un sestier de froment pour son trevail et avoit fait poier à l’ostalarie pour deffreer son cheval iiii sols et que ledit Lourens avoit bailé au sire de Marueil coppie de ladite informacion ; et neanmoins li avoit promis de mettre à (delivre) ledit vilage. Encores dist il plus que … parla plaidoie avec un appellé Gelade, qui li vuelt toulir une piece de terre que est deu fieu de monsgr le vicomte de Limoges, pour la fere atrere ou fieu d’Engolesme ; et ledit Lourens avocque et sostien ledit Gelade à l’encontre de luy qui demande ledit fieu.

Pierre Rossiau, tesmoing juré, dist et par son serement deppousa qu’il avoit ouy dire à Perrinet Forien, à Cruvelier, sergent de Marueil, et à Fouricat, de Marueil, que ledit Lourens Panet avoit fait une informacion à la requeste du sire de Marueil à l’encontre de monsgr le vicomte sur le mayne de Belussieres ; et en avoit baillé coppie audit sire de Marueil ; et ledit sire de Marueil li avoit donné pour son trevail I sestier de froment et l’avoit desfreé à Marueil juques à iiii sols.

Eymery de Vitrac, tesmoing juré, dist et par son serement deppousa qu’il estoit, l’autre jour nagueres, davant la pourte d’Exidueil et ouy que ledit Lourens Panet dist : “Et de quoy se courosse le lieutenant ? Quar par li je ne lerray point user de mon office, quar ma dame la cuide d’espouser” ; pour ce que l’om luy avoit dit qu’il estoit grant gasteur de biens et qu’il despendroit bien tielx quatre vicomtes comme cestuy . Encores dist plus ledit tesmoing qui parle qu’il a ouy dire à Jeoffroy de Monchuel que ledit Panet avoit heu d’un home xxx sols et li avoit fait jurer qu’il ne l’en descourist point.

Jehan Bony, tesmoing juré, dist et par son serement deppousa que ledit Lourens Panet avoit heu de luy qui parla xx sols par luy fere mernier la rente de Monsgr de la meyson deux dams ; et ladite rente li fut merniée par monsgr le lieutenant à la relation et conseil dudit Laurens ; et lui fut donée lettre ; mes ampres celle lettre a esté presentée en la court de Nautron et par la ditte court retenue.

Guillonet du Boys, escuier, tesmoing juré, dist et deppousa par son serement qu’il estoit un jour à Segur à l’ostel de Pierre Cotet, excuier, avec Gonin Melet qui lors estoit chancellier du vicomte de Lymoges, et vey et ouy que le chapitre de Saint Germain avoit envoié pour sceller oudit chancellier une lettre de une juridiction qu’il avoit achapté en la vicomté de Lymoges et li presantarent c sols pour le scel, lequel chancellier leur respondi qu’il ne leur scelleroit pas pour c escuez d’or non pas pour riens du monde quar ce seroit grant preiudice et grant domage de monsgr le vicomte et des siens ou temps à avenir. Et ampres la mort dudit Gonin, estant chancellier et procureur de la vicomté de Lymoges ledit Lourens Panet, ledit Guillonet par un jour s’en aloit vers Meremostier en la compaignie de Gonin Melet, fiulx de l’autre Gonin chancellier, et ouy dire en chemin oudit Gonin que ledit Lourens Panet avoit scellé la dite lettre et en avoit heu x francs, lesquelx il avoit baillé aux hers de Guillon Boyer pour une fience que ledit Guillon Boyer ou temps qu’il vivoit avoit fait par ledit Lourens pour la ferme de l’eglise de Nautron. Encores dist plus ledit Guillonet du Boys que ledit Laurens a heu par force d’un appellé Bodoynan xx sols et li a fait jurer qu’il n’en deist moult ; et ledit Bodoynan s’en veult plaindre a monsgr le lieutenant mes qu’il le voye.

Helie Faure, de Albignac, tesmoing juré, dist et par son serement deppousa que quant les Anglois estoient à Branthosmes [5], un anglois – mes du nom ne li recorde – manda par monsgr Gui Le Tourt à Laurens Panet, que ledit Laurens li attendist les covenens qu’il li avoit quar ce que l’Anglois luy devoit bailler estoit tout prest ; et ampres celui message, ne tarda guieres que ledit Laurens vouli achapter un cable du capitaine de Puey-Acut.

Arnaud Barbarin, tesmoing juré, dist et deppousa par son serement en tout et pour tout come Helie Faure.

Pierres Magalot, dit Le Clerc de Las Chartras, tesmoing juré, dist et par son serement deppousa que quant les Anglois estoient à Branthosme, ledit tesmoing estoit un jour oudit lieu de Branthosme et trova Perrot Gouton de Marueil, lequel li dit : “Clerc, ales vous en et prenes veus bien garde de votre lieu quar je ay entendu que les Anglois vous feront domage si puevent quar il y a aulcun traidour dedans” ; et ampres ne tarda pas xv jours que monsgr Gui Le Tourt vint de Branthosme et dist audit Laurens que un Anglois - lequel ledit monsgr Gui noma mes oudit tesmoing ne sovient pas du nom - li mandoit que li attendist les covenens que li avoit, quar ce que le Anglois li devoit bailler estoit tout prest ; duquel message fut grant brut en la ville de Nautron.

Mossr Bernart de Ceulx, chappellain de Saint Marsal [6] pres de Nautron, dist et deppousa que ou temps que li Anglois heurent prins la ville de Branthosme fut grant brutz et voux publique dedans [la] ville de Nautron que le lieu de Nautron devoit estre prins par lesdits Anglois [7] et que dedans la ville de Nautron avoit home qui le leur devoit bayler ; et durant celui brut et voux publique, ledit tesmoing ouy dire à monsgr Gui Le Tort que un Anglois de Branthosme avoit mandé à Laurens Panet qu’il se preist bien garde que li autendist les covenens qu’il li avoit quar ce qu’il li devoit bailler estoit tout prest.

Ceste presente infourmation fut faite par nous Guillaume Basat et Pierres de Pueydillon, notaires et jurés de la vicomté de Lymoges, par le expres comandement et instruxion à nous faite de bouche par le noble et puyssant home Pierres de Perrien, dit Le Bedas, lieutenant, garde et gouverneur de la vicomté de Lymoges pour très excellent prince et seigneur Olivier de Bretaigne, comte de Painthevre, vicomte de Lymoges, à l’encontre de Laurens Panet et de Bernart Panet, freres, sur les chouses desoubs escriptes ; et fut comencée le ix jour de mars l’an mil iiiic et huyt, avec les tesmoings qui s’enssuyent.

Jehan Louel, tesmoing juré, dist et deppousa par son serement que Symonet Franc, fiulz de maistre Pierres Franc, fist testament estant en la maladie don il moru ; et leyssa à un appellé Guillaume Panet, lequel estoit bastart x livres de rente, lequel Guillaume ampres le desses dudit Symonet se despera et se pandi ; et par ainssin lesdites x livres de rente doivent estre de Monsgr ; item leyssa à une fame dite La Gautiera la moytié de toutes ses vignes et x livres une foys poiées ; ladite fame mouru sans hers et sans testament ; et par ainssin Monsgr doit estre son heretier ; item leyssa ledit Symonet à Monsgr c livres ou cas que ses hers ne acompliroyent son testament ; et tou cecy est contenu ou testament dudit Symonet, lequel monsgr le lieutenant a devers soy ; et lesdits freres ont prins les biens dudit Symonet et departis entre eulx, et les tiennent et possedissent. Dist encores plus que ledit Lourens a achapté des freres meneurs de Nautron un pré don il doit les ventes à Monsgr. Encores dist il plus que un bastart, dit Le Bort de Brusac, ou temps qu’il vivoit tenoit et possedissoit une terre appellé la terre de Mayraven et une diesme en la terre de Nautron, c’est assavoir sur la Chabboudie, les Ramieres, la Torarie et plusieurs autres vilages ; et ledit Bort moru sans fere testament en l’abbaie de Perouse [8] ; et ampres le deces dudit Bort, ladite diesme fut mise à la main de Monsgr, et monsgr le vicomte en fut en possession et saizine par lonc temps et ledit Jehan Louel la a levée pour monsgr le vicomte. Et ampres tout ce, Bernart Panet, non obstant la saizine et la possession de Monsgr, de fait a prins ladite diesme et co…tre en ses propres usages, et changée et transpourtée avec l’abbé de Perouse. Encores dist plus ledit Jehan Louel que ledit Bernart Panet, den poys de temps en ca, a acquis par manière de venda la partie de l’heritage qui devoit appartenir à Perelle Panete, sa nepce, des biens qui furent de Jehan Panet, leur frere ; et ledit Bernart n’en est pas encoures vestus de Monsgr que l’om saiche. Dist encoures plus ledit tesmoing que ledit Bernart Panet aquis des freres meneurs de Nautron un hotel appellé La Maison de Bayone, don ledit Bernart doit les ventes à Monsgr. Encoures dist plus ledit tesmoing que ledit Laurens Panet a aquis de Gaston, son nepveu, tous ces heritages, cens, rentes et autres droits et devoirs que ledit Gaston avoit es paroisses de Plemeys, de Saint Bertholomieu et autres, de quoy il n’est pas vestus ne fait nesun devoir à Monsgr. Item dist ledit Jehan Louel que Mondon Paute, quant estoit lieutenant, fist mettre à la main de Monsgr toute la terre que fut de Symonet Franc pour les chouses contenues en son testament ; et non obstant ladite saizine, lesdits freres les usent et expplettent. Et oussi fist mettre à la main de Monsgr les biens de Jehan Cussac ; et non obstant ladite saizine, Bernart Panet fist poicher l’estanc de Jehan Cussac et en fist pourter le poisson en son estanc.

Guillonet du Boys, tesmoing juré, dist et par son serement deppousa que le Bort de Bruzac, ou temps qu’il vivoit, tenoit la terre de Mayrevent et une diesme ; lequel Bort moru sans hers et sens fere testament en l’abbaye de Perouse et en ycelle fut enterrés ; laquelle terre et diesme appartiennent et doit appartenir à monsgr le vicomte ; et Bernart Panet la tient et la com…… en ses propres usages et a bailé ladite diesme à l’abbé de Perouse par maniere d’eschange.

Mondon Paute, escuier [9], tesmoing juré, dist et deppousa par son serement que quant il fut lieutenant à Nautron pour monsgr Harpedanne, il mist et fist mettre par un sergent à la main de Monsgr toute la terre que fut de Symonet Franc pour les chouses contenues en son testament ; et non obstant ladite saizine, lesdits Bernart et Laurens ont usé et exspleité ladite terre et usent et exspletent tous jours en mespresant ladite saizine. Dist encores plus ledit Mondon que en celui temps mesmes, pour un debat que estoit entre Lourens Panet d’une partie et Janin Lagarde d’autre, sur les biens de Jehan Cussac, il mist et fist mettre à la main de Monsgr lesdits biens de Jehan Cussac ; et non obstant ladite saizine et main mise, ledit Bernart Panet fist poicher et poischa une serve ou estanc dudit Jehan Cussac et prist le poisson et le fist pourter et mettre en son estanc en mesprezant ladite mainmise. Encores dist plus ledit Mondon que en celuy temps (poniez) que Janin Lagarde disoit que Jehan Cussac l’avoit fait tuteur en son testament recehu par Lourens Panet ; et ledit Panet ne l’avoit pas mis oudit testament, il dona comission à Jehan Mercier de fere informacion sur cella ; et fut trové par tesmoings que ledit Cussac avoit fait tuteur ledit Janin de Lagarde et que ledit Lourens l’avoit laissé à escrire pour fauceté ou error ou autrement.

Arnaud Barbarin [dépose mot pour mot dans les termes de Jehan Louel]

Helias du Rival, tesmoing juré, dist et deppousa par son serement que ou temps que Mondon Paute, escuier, estoit lieutenant, fist mettre à la main de monsgr le vicomte toute la terre que fut de Symonet Franc pour les chouses contenues en son testament ; et non obstant ladite mainmise, lesdits freres usent et exploitent lesdits biens.

Basat ainxin est une avec Pierres de Pueydilhon

Pierres de Puydilhon, una cum magistro Guillelmo Bazatz, sic est

(Arch. dép. des Pyr. atl., E.805 ; le texte aboli du parchemin, rongé par les rats, est restitué en italique)

LETTRES ROYAUX DE FEUDIS EXHIBEES PAR LE SEIGNEUR DE MAREUIL

 

pour le repaire de Poufons, paroisse de Beaussac, et mémoires du vte de Limoges pour empêcher leur enregistrement (1506)

Pour tres hault & puissant prinse monSgr le viconte de Limoges, opposant & appellant de Jehan Souvard, soy disant sergent royal excequteur de lettres de feudis. A l’encontre de noble et puissant Guy, seigneur de Maruelh, en lad. viconté, impetrant & appellé selon que sera veu par le conseil. Et premierement est vray que mond. seigneur le viconte, tant par soy que ses predecesseurs dont il a droyt & cause, par tiel et si long temps que n’est memoyre du contraire est en possession & saisine de soy dire, p…noter & nommer seigneur direct et foncier du reppere et abergement noble nommé Poutfons, assis en la paroisse de Boussac, de lad. viconté. Item, les emphiteotes & tenenciers d’icelluy de toute ancieneté l’ont tenu & constinué de tenir de mond. seigneur le viconte & de sesd. predecesseurs par le temps susd. Item, est mond. seigneur le viconte en possession & saisine d’en prandre, lever & parcevoir les rantes & aultres devoirs seigneuriaulx à cause dud. albergement, par lesd. emphiteotes & tenenciers deuz entierement, paisiblement & sans contredit. [2] Item, led. impetrant a impetré lesd. lettres de feudis, dont len…voye le double, par lesquelles est narré que lad. borie est tenue dud. impetrant [&] par lesquelles est mandé & commis au premier huissier ou sergent royal que es choses … il trouvera que led. impetrant a mises à sa main par deffault de non payer ou qu’il mectra que mettre la main du roy en confortant la dud. impetrant & en cas d’opposition ou debat, lad. mainmise tenant des choses tenues noblement icelles bailhées à regir & gouverner soubz lad. main à (Bourdeaux) & souffissans commissaires, etc. Item, advenu à la notice du procureur de monseigneur le vicomte, s’est oppousé par devant led. sergent, qui l’a receu à sad. opposition, tant qu’il a peu & eu & …… ; et n’a point dit led. main tenant ne baillé ou deppousé commissere pour regir & gouverner led. albergement ains a donné ajornement pour dire lesd. causes d’opposition sans depputer commissaires comme dit est, comme il est contenu en la relation. Item, quant lad. opposition fust faicte & [que] led. sergent receust le procureur de mond. seigneur, led. procureur luy dist : “quant vous vouldrez dire que led. manoir est tenu noblement dud. impetrant et de ce vous appert ou a paru …, pour ce vouldriez tenir led. lieu soubz la main du roy”.

[3] Loys, par la grace de Dieu roy de France, au premier huissier de nostre parlement ou nostre sergent sur ce requis, salut. De la …… de nostre amé & feal conseillier & chambellain Guy, seigneur & baron de Mareilh & de Bourzac en Perigort, nous a esté expousé que aud. lieu de Marueilh, à cause et pour raison de sesd. chastellenies, baronies et seigneuries de Marueilh, Villeboys, Vibrac, Angeac, Charault & Bourzac, luy ……… & appartienent plusieurs beaulx, homaiges, reperes, manoirs & villages assis & situés esd. baronies & chastellenies, les ungs tenus à fieufz & homages & les autres returierement ; & entre aultres, & à cause de lad. baronie de Marueilh, a esté tenu d’ancieneté à fieufz & homage le repere & manoir vulgairement appellé de Poutfons avec ses appartenances, assis et situé en la paroisse de Boussac, chastellenie dud. lieu de Marueilh. Lequel de Maruelh ‑‑ ou procureur pour luy­ -- a faict par plusieurs et diverses foys & [a] publié en jugement, tant en la court provostelle que grandes assises dud. lieu de Marueilh, que les tenanciers [4] & occupateurs dud. reppaire ou manoir -- & aussi d’aultres plusieurs reppaires, maisons nobles & villages tenus du [Sgr de] Maruelh -- vinssent par devant luy faire les foy, homage, serement de feaulté, payer les devoyrs nobles & roturiers qu’ilz estoient [tenus] faire et payer selon les lieux ou biens tenus noblement ou par homage, ou bien luy payer lesd. cens, rantes & aultres devoirs deuz à cause d’iceulx. Lesquieulx tenanciers & occupateurs tant desd. reppaires, maisons nobles que villages n’ont tenu comte de venir par devant led. Maruelh luy faire les foy, homage, serement de feaulté, payer les devoirs nobles ou returiers. Et se efforcent de jour en jour iceulx lieux tenir, occuper & en prandre & percevoir les fruictz, proffiz et emolumens d’iceulx, en tres grand grief & prejudice & domage dud. de Maruelh et en mespris desd. amendemens judicieres et aultres faictz ; au moyen de quoy led. de Maruelh ou sond. procureur a faict saisir & mestre à sa main et par auctorité de sad. court led. reppere ou manoir de [5] Poutfons & ses appartenances, assis en lad. paroisse de Boussac, chastellenie susd. de Maruelh, par deffault de homage non faict & devoir non randu, et aussi le village du Cluzeau & ses appartenances, assis en la paroisse de Vandoyre & chastellenie dud. Borzac, par deffault de rente & aultres devoirs non payés ; aussi ay faict saisir et mettre en sa main plusieurs aultres repaires & villages & heritages assis esd. chastellenies de Maruelh [et] de Bourzac, le tout par deffault desd. hommages, cens, rentes, vantes, honneurs, achepte & aultres devoirs non faictz & payés. Mes, nonobstant lesd. saisines & mainmises, lesd. occupateurs & detenteurs desd. lieux les ont tenus & tiennent, sans eulx opposer ne avoir permission, & en prennent les proffiz & revenus d’iceulx en grand prejudice & dommaige dud. expousant, & plus pourroit estre si par nous ne luy estoit sur ce par… de …de de justice convenable. Pour ce est-il que nous, ces choses considerees, qui nous desirons subvenir à nos subiectz selon les exigence du cas, te mandons et quierrons par ces presentes que esd. choses esquelles led. expousant a mise sad. main ou mettra, tu, en icelles confortant gui… nostre main en confortant la sienne à la conservation du droyct dud. expousant et [6] en faisant inhibition & deffense de par nous, sur certaines grandes peynes à nous aplicquer, au personnes et tenenciers desd. choses ou d’aucunes d’icelles dont seras requis, que desd. choses ilz ne se mettant, ne entremettant, ne enfraignent nostre dicte mainmise ne celle dud. espousant ; et, en cas de opposition ou debat, nostre dicte mainmise tenant es choses tenues noblement ; et soubz icelles bailher et à regir [&] gouverner bons & suffisans commissaires qui en puissent & sachent rendre bon compte & reliqua quant & à qui il appartiendra adjorné led. expousant & faisant led. debat à certain & comportant jour en jour par devant noz seneschaulx & juges auqueulx la cognoissance en appartiendra pour dire leur causes de opposition, reffuz ou delay …… …… comme de raison & en rectiffiant souffissement aud. jour ou jours iceulx juges ou leurs lieutenants de tout ce que faict aura esté sur ce euxquels vous mandons que aux parties oyés fairent raison & justice, car ainsi nous plaist-il estre faict, nonobstant quelconques lettres subreptices impetrées ou à impetrer à ce contraire, mandons et commendons à tous nos justiciers, officiers et subiectz que à toi en ce faisant sans par… soy obey. Donné à Bourdeaulx, le penultieme jour d’avril l’an de [7] grace mil cinq cents & six, & de nostre regne le neufviesme. Ainsin signé au marge “Par le conseil, G. Ragueneau”.

A vous noble et puissant seigneur monseigneur le senechal de Perigort ou monseigneur vostre honorable lieutenant, certiffie …… je, Jehan Souvard, sergent royal & le vostre à tout honneur & recevance à vous deux obeissance, que le xiiime jour de ce present moys de juing, l’an mil cinq cens et six, par vertu & auctorité de certains lettres royaulx esmanées de la noble chancellerie du roy nostre sire, que soy tient au lieu de Bourdeaulx, données aud. lieu le penultieme jour dud. moys, l’an mil cinq cens & six, signées “Par le Conseil, G. Ragueneau”, scelées du grand seel en cire geaune, à moy bailhées & presentées de la personne de tres noble et puyssant seigneur Guy, baron et Sgr dud. lieu, ou de son procureur, me suis transporté au reppere de Poutfons, assis & situé en la paroisse de Boussac, chastellenie dud. lieu de Maruelh, … pour ce que …nement m’est aparu led. reppere & ses appartenances avoir esté mis à la main dud. seigneur pour deffault d’hommage, rantes & devoirs non faiz [8] à la requeste de sond. procureur, je, sergent susd., la mainmise et saisine ay notiffié & faict ascavoir à Pierre, dit Perrot, Tornepiche …… de la …… & Martial Tornepiche, illec presens, tenenciers dud. reppere & ses appartenances & à tous autres en general en laquelle confortant & à la conservation dud. droict dud. Maruelh ay mis & saisy led. reppere & ses appartenaces à la main du roy nostre Sgr, en faisant inhibition & deffance de par led. seigneur à la peyne de cent mars d’argent ausd. Perrot & Martial Tornepiche & à tous aultres en general que dud. reppere & sesd. appartenances ilz ne soy entremettant ne enfraignent lesd. mainmises, scavoir est du roy nostre seigneur et du Sgr de Marueilh, iceulx offrant & à tous aultres ………… & leur signer jour conpertant & devant vous pour proceder avecques led. de Marueilh et dire leurs causes de opposition comme il appartiendra pour raison ; lesqueulx moy firent response que pour le present ne soy vouloyt poinct oppouser ains soy garderoyent de mesprandre ; et tout ce mond. seigneur vous certiffie estre vray & par moy [9] ainsin estre faict & estre …… …… la relaxion signée de nostre seing manuel duquel je use en mon office de sergent …… ce es presence de messire Helies Ranpnol, pretre, & Perot Micheau, marchant demorant au lieu des Grauges, tesmoings à ce fere par moy appellés & requis. Et advenant le xvime jour desd. moys & an susd. au lieu de Marueilh, là où je fays ma residence continuelle, soy sont venus presenter par devant moy, sergent susd., lesd. Perot & Martial Tournepiche, les queulx, ampres la narration & con…… des choses susd. par eulx faicte, m’on requis & demandé leur bailler le double desd. lettres royaulx ensemble la relaxion de mes exploix pour le tout pourter & monstrer à monseigneur le procureur de tres excellent monseigneur le vicomte de Limoges du quel ils disent tenir à vante renteriere led. reppere & sesd. appartenances & heu sur ce comseilh aud. procureur & aultrement que bon leur semblera venir faire tieule response que bon leur semblera, lesquieulx doubles avec ma relaxion leur ay octroyé, et ce en presence de noble [10] homme Helies Joubert, escuyer, & Nadau Gouguet, temoings. Et advenant le xxiiiime jour de ce present moys d’aoust, l’an mil cinq cens & six, moy sergent susd., estant au lieu de Nontron, s’est comparu devant moy honorable homme maistre Jehan de Puysilhou, le quiel, comme procureur de tres hault et excellent prince monseigneur le viconte de Limoges en sa juridition de Nontron, s’est oppousé à mesd. exploix, moy requerant aud. non que le voulzisse recevoir à sad. opposition, ce que je ay faict tant que je ay peu & deu ; item, l’ay adjorné pardevant vous, monseigneur ou monseigneur vostre lieutenant de Perigueux, au mardi ampres la feste de Sainct Jehan de goulasse …… …… pour dire & declarer les causes & raisons de sad. opposition & pour proceder aud. nom avec led. tresoubs Guy, Sgr & baron dud. lieu de Marueilh ; item, tout ce mond. Sgr vous certiffie estre vray & par moy ainsi avoir esté faict par ceste mieme presente relaxion signée de moy, officier de sergenterie, lesd. jour, moys & an susd. ; item, ce en presence de honestes personnes maistre Jehan de Puyreynier & Pierre Mercier, marchands, demeurans à Maruelh, tesmoings a ce fere appellés & requis. Ainsin signé : Souvard, sergent susd. [11] Item, depputés commissaires, led. procureur en …… appelle mais en lad. relation n’est faicte aucune mention de ce dire Item pour ce soyt ainsi par le conseil de mond. seigneur se sera expediant persister aud. appel & en avoir la permission pour le faire muer et guerpir en opposition ou bien proceder selon led. adjornement. Item, il semble que, actendu que led. excequteur ne dit poinct que liy ayt aparu estre tenu noblement dud. impetrant & que ne faict entretenir lad. mainmise & ne deppute commissaires que n’est jà necessaire persister aud. appel ne de impetrer lad. provision ains dire pour ces causes d’opposition et que dit est. Item, et que led. de Marueilh est tenu de mond. Sgr à fieufz & homage, et que n’est pas vraysemblable que mond. seigneur tieigne de sond. vassal. Item, soyt advisé de soy garder fere desnie de l’homage …… ……… que seroit deu mais mond Sgr a juste cause de ignorance comme myeulx verra led. conseil. Item, en tout qu’il adviendra & sera dit, lesd. officiers de Nontron pour mond. Sgr soyent advertis & conseillés.

(Arch. dép. Pyr. Atl., E.706 ; coté 65 par l’inv. E.607 ou ses copies Bibl. nat., fr. 18835 ou Doat 241).

PROCES-VERBAL DE VERIFICATION DE LA BARONNIE DE MAREUIL (20 mars 1545)

Sachent tous qu'il appartiendra que ……, Nicolas d'Angeou, conte de Sainct-Fargeau, baron de Mezieres, de Mareilh et Villebois, seigneur de Bourzac, Vibrac, Angeac-Charente, Sainct-Maurice, Charny, Thuré et Senesché, et gentilhomme ordinaire de la chambre de Monsieur le Daulphin, avons et tenons et advohons tenir de tres hault et exelant prince le Roy de Navarre, conte du conté de Perigort, à cause de sond. compté à houmaige lige et serment de feaulté à faire à muance de seigneur, sans aultre charge ne debvoir, touttes et chascunes les choses que s'ensuyvent.

C'est assavoir nostre chasteau, barronnie, chastellenye, terre et seigneurie dudict Mareilh, avecques noz fiefz et reffiefz, nobles et non nobles, estant en et au dedans nostre dicte chastellenie et barronnie cy dessus confronté, ou ailheurs à cause d'icelle ; et se confronte d'une part au lieu appellé le Pas des Charettes sur la riviere de Nizonne, icelle comprenant, et dessandant contrebas vers la Rochebeaucourt, layssant lad. barronnye de Mareulh sur main gaulche ; et suyvant lad. riviere contrebas jusques au lieu appellé le Pas de Fontaines ; et illec, layssant lad. riviere de Nyzonne sur main dextre et retournant sur main gaulche le long du chemin par lequel on va dud. Pas de Fontaines à la Tour-Blanche ; et continuant icelluy dict chemin vers lad. Tour-Blanche jusques au ruysseau qui dessend du molin des dames de Fontaines vers lad. riviere de Nyzonne, et icelluy comprenant ; et suyvant led. ruysseau vers Fontaines jusques à ung petit ruisseau qui part de la Font-Ryault ; et suyvant icelluy dict ruisseau jusques à ladicte Fontaine, et layssant icelled. Fontayne sur main dextre ; et prenant ung terier, icelluy suyvant jusques à ung grand noyer forchu appartenant à Guilhou Goureau ; et d'illec traverssant ung jardrin des heirs à feu Helies Colomb jusques à ung coing d'ung aultre jardrin où il soulloyt avoir une croix de boys [1º] qui est tenant au vieux cimitiere du bourg de Fontaines ; et d'illec, suivant une murailhe jusques au chemin par lequel on va de Fontaines à Goutz ; et continuant icelluy dict chemin d’envers led. Goutz jusques à ung carrefour où la divise faict retour sur main gaulche ; suyvant tousiours icelluy dict chemin vers led. Goutz et layssant ladicte chastellenie de Bourzac sur main dextre jusques au carrefour appellé de Main-Morte ; et d'icelluy dict carrefour tirant le long dud. chemin vers led. Goutz jusques à une borne plantée au lieu appellé Les Combettes, où la divise faict retour sur main dextre ; tirant le long d'ung seilhon ou sentier vers la riviere de Main-Morte, layssant tousiours lad. chastellenie de Bourzac sur main dextre ; et suyvant lad. riviere de Main-Morte le long d'une petitte noue d'ung cousté d’envers Bourzac par les terres labourables ; suyvant tousiours lad. noue jusques au grand ruysseau qui dessand du molin de Vigeyrault et va au molin de Pudault où la divise faict retour sur main gaulche.

Et suyvant icelluyd. ruysseau contremont vers led. molin de Vigeyrault et layssant la chastellenie de Gressignac sur main dextre et aboutissant aud. ruisseau ; et d'icelluy dict molin de Vigeyrault suyvant tousiours led. ruisseau jusques au molin de Soulet ; et d'icelluyd. molin de Soulet suyvant led. ruysseau jusques au molin de Pepy ; et d'icelluy dict molin de Pepy suyvant le dict ruysseau jusques au molin du Guo ; et d'icelluy molin du Guo suyvant led. ruisseau jusques au molin de Grenoilhies ; et d'icelluyd. molin de Grenoilhies suivant le dict ruysseau jusques au molin de l'Estang des Faures, layssant les chastellenies de Grezignac & Tour-Blanche sur main dextre, icelluy dict ruysseau faisant divise desd. chastellenies de Grezignac et Tour-Blanche et lad. barronnye de Mareulh.

Et d'icelluy dict molin des Faures suyvant ledict ruysseau jusques au molin d'Yssac ; et dudict molin d'Issac suyvant tousiours led. [2] ruysseau en comprenant la moictié de l'estang et faisant divise entre lad. barronnye de Mareilh et la Tour-Blanche.

Et suyvant icelluyd. ruysseau envers Roussignol jusques auprès du puys de Rossignol envyron de vingt ou trente brasses et jusques à la jurisdiction dud. Rossignol, où la divise faict retour sur main gaulche en une petitte combe et terier ; et suyvant icelluy dict terier & combe jusques au chemin par lequel on va de Goutz à Rossignol où la divise faict retour sur main dextre ; et continuant icelluy dict chemin vers Rossignol et jusques au bourg dud. Rossignol ; et d'icelluy dict chemin vers Lagulhac jusques à ung fossé où la divise faict retour sur main gaulche, led. chemin faisant divise entre les habitants du village de Leycousseys et du village de Jouvelle et de lad. barronnye de Mareulh et jurisdiction de Lagulhac, layssant lad. jurisdiction de Lagulhac sur main dextre ; continuant icelluyd. chemin jusques au grand chemin, sive pousge, par lequel on va de Bourdeaulx à Limoges, où la divise faict retour sur main gaulche ; suyvant icelluy dict chemin et pousge, icelle comprenant, et continuant jusques au village des Potances, layssant lad. jurisdiction de Lagulhat sur main dextre.

Et du dict village des Potences suyvant tousiours led. grand chemin et pousge, icelle comprenant, vers et jusques au village de Pontarnault, lad. pousge faisant divise entre lad. barronnye de Mareulh et la barronnye de Bourdeilhe ; et dud. village de Pontarnault suyvant tousiours le dict grand chemin et pousge jusques au lieu appellé Les Trois Pierres, layssant le dict village de Pontarnault en la dicte barronnye de Mareulh et la dicte barronnye de Bourdeilhe à main dextre.

Et desdictes Trois Pierres où la divise illec faict retour sur main gaulche et suyvant le grand chemin public par lequel on va de Sainct-Perdoux-la-Riviere à Mareulh & au bourg & paroisse des Granges, layssant la chastellenye de Bernardieres sur main dextre ; et continuant icelluy dict chemin vers les Granges jusques à ung [2º] carrefour de chemins, l'ung allant de Mareulh à Sainct-Sulpice, layssant lad. jurisdiction de Sainct-Sulpice sur main dextre ; et continuant tousiours icelluy dict chemin vers les dictz Mareulh, Granges et Pont d'Ambelle jusques à une borne plantée au milieu dud. chemin près et joignant le chemin par lequel on va dud. Marueilh au repayre de la Vergne, où la divise faict retour sur main dextre ; et suyvant led. chemin par lequel on va dud. Marueilh vers la Vergne jusques au ruysseau de La Font, où la divise faict retour sur main gaulche ; et suyvant icelluy dict ruisseau jusques au fleuve de Nizonne, layssant tousiours la terre de Sainct-Sulpice sur main dextre.

Et icelluy dict fleuve de Nizonne suyvant & continuant jusques à la planche qui est au bout de l'estang du repayre d'Aulcort, au droict d'ung cluzeau qui est en le rochier pres dud. estang, où la divise faict retour sur main dextre ; suivant et continuant ung ruisseau et fossé faisant divise entre lad. barronnye et la jurisdiction des Combes, barronnye demeurant sur main gaulche ; et tousiours continuant icelluy dict ruysseau et fossé jusques au lieu appellé Le Pas-de-la-Chabrolle, joignant à la terre de Connezac.

Et dudict lieu du Pas-de-la-Chabrolle, suyvant le long d'une combe montant contremont jusques au lieu appellé la Font-de-Donzac, layssant tousiours ladicte jurisdiction de Connezac sur main dextre, le fil de ladicte combe faisant divise entre lad. barronnye et jurisdiction de Connezac jusques à lad. Font-de-Donzac ; suyvant le long d'ung terier ou sentier tirant contremont jusques au dessus du village de Donzac quarante brasses ou environ et jusques à ung vieulx terier où il y a une borne plantée, où la divise faict retour sur main dextre, suyvant ung sentier ; et continuant icelluy dict sentier vers le Lac-Plat jusques à ung terier où la divise faict retour sur main dextre ; et continuant icelluy terier jusques à la terre du Viradis, où la divise faict retour sur main dextre ; et suyvant icelluy dict terier jusques au bois de [3] Pinsonnieras, où la divise faict retour sur main gaulche ; et suyvant icelluy dict terier jusques au bois de Clinmiche, où la divise faict retour sur main dextre ; et suyvant ledict bois de Clinmiche et Pinsonnieras et allant entre deux jusques à une borne et près de la coulx du village de Clinmiche ; et de lad. borne tirant droict à une grosse pierre ou roche qui est posée dans une terre labourée appellée la terre de Clinmiche ; et de lad. pierre, dessandant contrebas jusques à ung terier près l'estang de Connezac, faisant divise entre lad. barronnye et la jurisdiction de Connezac, où la divise faict retour sur main gaulche ; et suyvant icelluy dict terier envers Font-Boulhaut et jusques à lad. font ; et d'icelled. Font-Boulhaut, tirant contremont le long d'ung terier et haye jusques au carreffour qui est près du Lac-Sallé, où la divise faict retour sur main gaulche ; et prenant le chemin par lequel l'on va des Combes à Haulte-Faye et continuant icelluy dict chemin jusques au Lac-Plat ; et continuant tousiours led. chemin vers Haulte-Faye jusques aux carreffours des chemins dud. Haulte-Faye et au chemin que part de Javerlhat et va vers Mareulh, où la divise faict retour sur main gaulche, layssant lad. jurisdiction de Connezac sur main dextre.

Et suyvant icelluy dict chemin de Javerlhac envers Mareulh jusques au chemin par lequel on va de Mareulh à Faye-Marteau, où la divise faict retour sur main dextre ; suyvant icelluy dict chemin envers Faye-Marteau jusques à ung fossé où la divise faict retour sur main gaulche ; tirant le long dud. fossé et ruat jusques à la Font-de-Broulhiac, ledict fossé faisant divise entre lad. barronnye et jurisdiction de Javerlhac, layssant lad. jurisdiction de Javerlhac sur main dextre ; et de lad. Font-de-Broulhac, tirant le long d'ung chemin par lequel on va de Mareulh et Haulte-Faye, où la divise faict retour sur main dextre ; et continuant icelluy dict chemin vers Haulte-Faye, ledict chemin faisant tousiours divise de lad. barronnye & jurisdiction de Javerlhac.

Et icelluy dict chemin continuant jusques au grand chemin public par lequel on va de Charras à Nontron, appellé le Chemin-Feron [3º] faisant divise entre lad. barronnye de Mareulh et la barronnye de Marton, où la divise faict retour sur main gaulche.

Et continuant icelluy dict Chemin-Feron vers Charras jusques à ung terier où la divise faict retour sur main gaulche, ledict terier faisant divise entre ladicte barronnye et jurisdiction de Charras ; et continuant icelluyd. terier contremont jusques au lieu appellé La Lande, où la divise faict retour sur main dextre, où y a ung terier ; icelluy dict terier continuant envers le lieu appellé Le Grand Lac, icelluy dict terier faisant divise entre lad. barronnye de Mareilh et jurisdiction de Charras ; et icelluy dict terier continuant jusques au Grand Lac, en lequel et au milieu d'icelluy dict Lac y a une borne plantée ; et d'icelluy dict Lac continuant tousiours ledict terier jusques au grand chemin par lequel on va de Mareulh à Marton, où y a une borne plantée ; et d'icelled. borne tirant droict au Lac des Granges, dans lequel y a une boyne plantée ; et d'icelled. boyne plantée et Lac des Granges tirant droict au Jarric Boynat, où la divise faict retour sur main gaulche ; et d'icelluy dict Jarric Boynat suyvant le grand chemin par lequel on va de Marton à Mareulh ; et d’icelluy dict chemin continuant envers Marueilh jusques à une borne plantée sur ledict chemin, où la divise faict retour sur main dextre ; et d'icelled. borne tirant contrebas le long d'ung terier jusques au chemin par lequel on va des Granges au Cluzeau ; traverssant ledict chemin et reprenant ledict terier tirant droict contremont ; et continuant ledict terier jusques au fleuve de Nizonne Vieilhe au lieu appellé Le Pas des Charettes.

Avecques les bourgs et parroisses qui sont encloses au dedans ladicte barronnye et chastellenye : premierement la parroisse de Sainct-Theodore de la Rochebeaucourt, Argentine, Bournet, Fontaines, Goutz, Soullet, Sainct-Perdoux, Vieulx-Mareilh, Montsec, Pontarnault, Beaussac, Les Granges, Saincte-Croix, Sainct-Priest et Mareulh, avecques touttes & chascunes ses appartenances, appandances & deppandances [4] quelzconques en tout droict de justice, jurisdiction haulte, moyenne et basse, mere & mixte et impere, et tout ce qui en deppand: seelz aux contractz, droict de bannage, espavves, guet, biens (communaux), coustumes, droictz, cens, rantes, debvoirs quelzconques, forestz, boys, bourages, estangs, eaux, pescheries, deffances d'icelles, prairies, dixmairies, agrieres, terages, peageries, molins, fours, fuyes, guarennes, teres labourables et aultres teres homme couchans et levans, et tout ce que touttes personnes nobles & non nobles tiennent de nous noblement et à roture tant à cause de nostred. chasteau, barronnye et chastellenye, tere & seigneurie dudict Mareulh et appandances d'icelle que aultrement d'en…ement.

Item nous Nicolas d'Anjou, conte susdict, avons et tenons et confessons avoir et tenir dud. tres hault et exellant prince le Roy de Navarre, conte du compté de Perigort, à cause de sondict compté, soubz ledict hommage lige et serement de feaulté à faire à muance de seigneur sans aultre charge ne debvoir, le chasteau, chastellenie, tere et seigneurie de Bernardieres, en comprenant les paroisses desd. Champeaux, Chappelle-Pommier, Sainct-Sulpice, Lussac, Font-Troubade, avecques touttes & chascunes leurs appartenances, appandances & deppandances quelzconques en tout droict de justice, jurisdiction haulte et moyenne & basse, mere, mixte et impere, et tout ce qui en deppend : seelz aux contractz, droict de bannage, espavves, guet, biens (communaux), coustumes, droictz, cens, rantes, debvoirs quelzconques, forestz, boys, vourages, estangs, eaulx, pescheries, deffances d'icelles, prairies, dixmairies, agrieres, terages, peageries, molins, fours, fuyes, guarennes, teres labourables et aultres teres homme couchans et levans, et tout ce que touttes personnes nobles tiennent noblement et à roture tant à cause de nostred. chasteau, barronnye, tere et seigneurie de Mareulh que Bernardieres, deppandances d'icelles, que aultrement d’en……ement.

Et se confronte lad. chastellenye, terre et seigneurie de Bernardieres, parroisses de Champeaux, Chappelle-Pommier, Sainct-Sulpice, Lussac & Font-Troubade, [4º] d'une part et au chemin par lequel l'on va de Mareulh à Sainct-Perdoux- la-Riviere et à la chastellenye, terre & seigneurie de Nontron d'aultre part, et à la terre et chastellenye de Javerlhac et à lad. barronnye, terre & chastellenye de Marueilh d'aultre part.

Et touttes et chacunes les choses susd. confrontées & designées, nous, d'Anjou, conte susd., confessons et advohons tenir et avoir tenu, tant nous que nos predecesseurs, seigneurs et barons dudict Mareulh, de mond. tres hault et exellant prince le Roy de Navarre, conte dudict compté de Perigort, à cause de sond. compté de Perigort, soubz les hommage lige & serement de feaulté à faire à muance de seigneur sans aultre charge ne debvoir, comme dict est ; suppliant et requerant led. tres hault et exellant prince que sy aultre chose nous avons mis ou obvié de mettre plus ou moins soubz la foy et hommage dessusd. et puisse venir à sa noption, luy plaise de sa grace le nous reveler ou faire reveler. Et protestaons que, sy tost que sera venu à nostre notice & cognoissance, sy plus y a, nous l'employerons ou ferons employer, et sy moingt, diminuerons, osterons, corrigerons, modiffierons et fairons tout ce qu'il appartiendra de faire par raison.

En tesmoing desquelles choses nous, Nicolas d'Aniou, avons bailhé ce presant adveu & denombrement marché de nostre main et faict signer à nostre requeste du notaire cy dessoubz escript et faict sceller des seaux de nostred. barronnye (et avec le guarde des seaulz de lad. baronnie) de Maruelh. A la requeste dudict hault & puissant seigneur, conte et baron dud. Marueilh et fealle rellation du notaire juré de la court du seaux, qui a faire les choses susdictes a esté presant, le scel auctenticque à ces presantes avons micz et apposé en tesmoingt de veritté. Donné et faict au chasteau de Marueilh le vingtiesme de mars l'an mil cinq cens quarante cinq, en presance de Jehan de Lyvens, escuyer, seigneur des Deffens [10], et François Le Noir, escuyer, sieur de La Riviere, tesmoingtz cogneus. Ainsin signé en l'orriginal des presantes : N. d'Anjou, et plus [5] bas : Par commandement dudict seigneur et à sa requeste, Gratrau, notaire.[…]

(Arch. dép. Pyr. Atl., E.767)



[1] - Il existait une « maison noble de Panet » dans le “Bragier” de Nontron (RdL, p. 19).

 

[2] - On a tenté de restituer en italiques les zonbes abolies du texte.

 

[3]  -  Pierre Forien, + en 1405, et Guy Fourien, + en 1415 (mentions sans réf. dans les arch. de Bellussière) ; Forton Fourien (montre de 1470) ; Fourien de Bellussière, procès-verbal contre Mathurin et Jean Batlavoyne, 1479 (ADD, 2E.745) ; en 1524, Forton Fourien fera hommage de sa maison noble de Bellussière à Alain d’Albret (Arch. dép. des Pyr. Atl., E.706) ; 1541, François Foryen, écuyer, Sgr de Bellusière, hommage à Limoges (BN, fr. 32528, p. 162) ; 1583, réformation du domaine de Bellussière par Jean Personne, juge d’Ayen (ADPA B.1885) ; 1583, Jean de Saint-Mathieu, écuyer, Sgr de Bellusière, hommage pour Bellusière, avenue à sa femme, Honorette de Lageard par la succession de François Forien, son fils du premier lit (BN, fr. 32528, p. 429).

 

[4] -  (Ver)Teignac : écart en Beaussac.

 

[5]  -  Le siège et la prise de la ville de Brantôme sont de l’été 1405 (L. Dessalles, Hist. du Périgord, t. 2, p. 400-405), soit 4 ans avant cette enquête.

 

[6]   - Saint-Martial-de-Valette.

 

[7]   - Nontron n’aurait été effectivement prise que deux ans après Brantôme, en 1407 : “Et pour ce que aussi depuis trois ans, en ça, lesdicts Anglois ont prins par eschellement ladicte ville, ycelle pillée, desrobée et bouté le feu, tué, meurtri et emprisonné plusieurs des gens d’icelle ville et chastellenie ; qu’ils n’ont bonnement de quoy vivre […] De laquelle ville qui est moult grande, fourte et spacieuse, et du chastel qui est aussy moult grant, fort et spacieux et comme inexpugnable, se ils estoient prins et occupés par nos ennemis, que ja ne adviengne, tout le pays d’environ poroit estre et seroit du tot desert, destruit et gasté.” (Lettres royaux, datées du 10 juin 1410, éditées in RdL, p. 75).

 

[8]   - En Saint-Saud-La-Coussière.

 

[9]   - Sr de Maignac (RdL, p. 259).

 

[10]  - Jean de Livenne, “maistre d’hosted dud. seigneur de Mareuil” (AD Char. E.77, 1544).

<<Retour