<<Retour

Aquitanica Concilia

 

Ex variis codicibus Mss.

Studio diligenti collecta.

Karrofense concilium

Celebratum Kalendis Junii anno circiter DCCCCLXXXVIII.

certe ante annum DCCCCXC. quo obiit Hugo

Episcopus Engolismensis.

Ex codice Engolismensi Joannis Tilii Meldensis Episcopi,

ex quo & sequens.

 

 

Praedecessorum nostrorum auctoritatibus Synodalicis roborati. In nomine Domini & Salvatoris nostri Jesu-Christi. Kalendis Junii. Ego Gumbaldus Archiepiscopus secundae Aquitaniae cum omnibus Episcopis comprovincialibus convenimus aulam quae olim Karof vocitatur, tam Episcopi, quam & religiosi Clerici, necnon etiam & omnis uterque sexus, auxilium divinae pietatis implorantes, ut qui quae quondam in nostris domiciliis moribus pestiferis per longam tarditatem Concilii diu pullulare cognovimus, respectu caelestis gratiae & eradicentur noxia & plantentur utilia. Nos ergo in Dei nomine specialiter congregati decrevimus, sicut in sequentibus manifestata clarescantita.

I. Si qui Ecclesiam Sanctam Dei infregerit, aut aliquid exinde per vim abstraxerit, nisi ad satis confugerit factum, anathema sit.

II. Si quis agricolarum, caeterorumve pauperum praedaverit ovem, aut bovem, aut asinum, aut vaccam, aut capram, aut hircum, aut porcos, nisi per propriam culpam; si emendare per omnia neglexerit, anathema sit.

III. Si quis Sacerdotem, aut Diaconum, vel ullum quemlibet ex clero arma non ferentem, quod est scutum, gladium, loricam, galeam; sed simpliciter ambulantem, aut in domo manentem invaserit, vel ceperit, vel percusserit; nisi post examinationem proprii Episcopi sui, si in aliquo delicto lapsus fuerit, sacrilegus ille, si ad satisfactionem non venerit, a liminibus Sanctae Ecclesiae Dei habeatur extraneus.

 

Ego Gunbaldus Archepiscopus Burdegalensis.                                  Subscripsi.

Ego Gislebertus Pictavensis Episcopus.                                               Subscripsi.

Ego Hildegarius Lemovicensis Episcopus.                                          Subscripsi.

Ego Frotarius Petrocororum Episcopus.                                               Subscripsi.

Ego Abbo Sanctonum Episcopus.                                                         Subscripsi.

Ego Hugo Egolismensis Episcopus.                                                      Sunscripsi.