16 mars 1198

 

Référence: Potthast, n° 49

Burdegalensi archiepiscopo scribit de canonicis Lemovicensibus, qui Guidonem Marnoli presbyterum in canonicum recipere nolebant; mandat ei, ut procuratori praefati presbyteri ejus nomine sine cujuslibet interpositione personae stallum in choro et in capitulo locum assignet. XVII kal apr. anno 1°.

Edition; Etienne Baluze, Epistolarum Innocentii III, romani pontificis, libri undecim accedunt, tomus primus, 1682, Liber I, epistola 55.

Edition: Migne, Patrologie latine, 1855, CCXIV, 47, n° 55, 1855.

 

 

De sententia lata pro canonicis Lemovicen. per dominum Celestinum,

et de ipsius revocatione veritate cognita per eundem,

et quod dominus Innocen. praecipit executioni mandari quod factum est per dominum Celestinum.

 

Burdegalen. archiepisc.

Cum felicis recordationis Celestinus papa praedecessor noster bonae memoriae R. Petragoricen. episcopo dederit in mandatis, ut si S. quondam episcopus et canonici Lemovicen. dilectum filium nostrum Guid. Marnoli presbyterum infra viginti dies post suscetionem literarum suarum in canonicum et fratrem nollent recipere, ipse sublato appellationis obstaculo id exequi non tardaret; eisdem canonicis praeceptum illius et commonitionem ipsius episcopi contemnentibus, termino viginti dierum elapso, cum dictus episcopus ad ecclesiam Lemovicen. mandatum praefati praedecessoris nostri executurus accederet, quidam canonici Lemovicen. cum quibusdam clericis, et aliorum canonicorum servientibus, et laicorum multitudine juxta portas civitatis suae, in illum et ejus socios irruentes, in quodam coemiterio praefatum G. presbyterum et quosdam alios in facie ipsius episcopi nimis turpiter et inhoneste tractarunt, et duris verberibus affecerunt, et ablatis eis equitaturis, donec longe a civitate expulerant, ingenti clamore fuerunt ipsos cum lapidibus insecuti, et P. subd. usque ad effusionem sanguinis in capite percusserunt. Episcopus vero reversus ad propria, praedictum G. presbyterum de Lemovicen. canonica juxta mandatum apostolicum solenniter investivit; et idem praedecessor noster investituram ipsam ratam et firmam habens, auctoritate curavit apostolica confirmare. Verum cum idem presbyter cum literis ab eodem praedecessore nostro super investitura concessis ad propria remeasset, Aldovin. Bruschare ipsisue ecclesie canonicus contra ipsum a capitulo destinatus, adversus eum multa proponens, a praefato antecessore nostro ecclesiam ipsam per indulgentiam sedis apostolicae ab ipsius impetitione obtinuit prorsus absolvi. Ceterum quoniam idem praedecessor noster postmodum multorum relatione cognovit quod ea quae contra praefatum presbyterum fuerant allegata, a veritate penitus discreparant, venerabili fratri nostro Bituricen. archiepiscopo sub omni districtione praecepit ut non obstante indulgentia illa, vel alia, si quam in ipsius presbyteri praejudicium impetratam esse constaret, universos canonicos Lemovicen. ecclesiae publice singulis festivis diebus nunciaret, omni dilatione, excusatione, contradictione, occasione, et appellatione postpositis, tamdiu excommunicationis, et eorum ecclesiam interdicti sententiae subjacere, donec praefatum presbyterum ad canonicam ecclesiae suae, de qua est auctoritate apostolica per supradictum episcopum investitus, admitterent, et permitterent illum eam in pace tenere; alioquin illos tam excommunicatos, quam ab officiis beneficiisque suspensos, poenam de contemptu debitam recepturos, ad sedem apostolicam nullius contradictione vel appellatione obstante transmittere non tardaret. Illos vero, qui in saepedictum presbyterum et praedicti episcopi socios manus temerarias injecerunt, tamdiu anathemati subjacere, et omnium officiorum ac beneficiorum, sublato appellationis diffugio, auctoritate suffultus apostolica, extorres decerneret, donec eidem episcopo et eorum sociis, ab illis foret de illatis injuriis plenarie satisfactum, et cum literis ipsius archiepiscopi veritatem rei plenarie continentibus venirent ad sedem apostolicam absolvendi. Praedictus autem archiepiscopus eos officio beneficioque suspendit, et ecclesiam Lemovicen. supposuit interdicto, quam sententiam ipsi canonici servare penitus contempserunt. Nos igitur quod super hoc factum est, ratum habentes et firmum, fraternitati tuae per apostolica scripta mandamus, et districte praecipimus, quatenus juxta praescriptam formam ultimam transmissam archiepiscopo memorato, sublato cujuslibet contradictionis et appellationis obstaculo, in praedicto negocio procedere non omittas; procuratori praefati presbyteri ejus nomine sine cujuslibet interpositione personae stallum in choro, et in capitulo locum assignans. Nullis literis obstantibus dicto G. praesente, et respondere parato, in harum praejudicium a sede apostolica impetratis. Datum Laterani, XVII kalend. aprilis.