22 janvier 1203

Référence: Potthast, n° 1812.

Abbatibus de Corona et de Borneto Engolismensis dioc. Mandat, ut in causa clerici Petri Arlagras, cui praebenda in ecclesia Petragoricensi juxta mandatum b. M. C(oelestini) papae praedecessoris assignanda fuisset, sine mora procedant. XI kal. februarii, anno 5°.

Edition: de Brequigny et La Porte du Theil, Diplomata, chartae, epistolae, leges, etc., 1791, tom. II, I, 219.

Edition: Migne, Patrologie latine, 1855, CCXIV, 1162, n° 150.

Abbatibus de Corona et de Borneto, Engolismensis dioeceseos.

Mandat eis ut in causa Petri Arlagras, clerici, cui praebenda in ecclesia Petragoricensi, juxta mandatum C... papae, assignanda erat, sine mora procedant.

Constitutus in praesentia nostra dilectus filius, Petrus Arlagras, clericus, sua nobis insinuatione monstravit quod, cum a bonae memoriae C(oelestinus) papa, praedecessore nostro, ad A(demarus) quondam episcopum et capitulum Petragoricenses, ut ipsum in fratrem et canonicum suum reciperent, litteras deprecatorias et praeceptorias impetrasset, ipsi apostolica mandata surdis auribus transeuntes, id efficere neglexerunt. Tandem ad venerabilem fratrem nostrum Burdegalensem archiepiscopum et te, fili abbas de Corona, ut eum in corporalem possessionem induceretis canonicae [sic] memoratae, appellatione cessante, litteras exsecutorias impetravit. Cum autem vos eum de canonica curaretis juxta mandatum apostolicaum investire, contradictores, eadem auctoritate suffulti, ab officio et beneficio suspendistis, qui nec sic eum recipere nec suspensionis voluerunt sententiam observare. Postmodum vero ad venerabilem fratrem nostrum ... episcopum Petragoricensem, et dilectum filium ... priorem de Corona, a nobis litteras exsecutorias impetravit, ut dictos canonicos, remoto appellationis obstaculo, usque ad condignam satisfactionem facerent excommunicationis sententiae subjacere, ipsam pulsatis campanis et accesis candelis, singulis diebus festivis et Dominis innovantes. Sed quia in ipso negotio juxta formam mandati apostolici procedere neglexerunt, et tantae praesumptionis excessum, qui in contemptum apostolicae sedis noscitur redundare, non debemus clausis oculis praeterse, discretioni vestrae per apostolica scripta mandamus atque praecipimus quatenus, juxta quod eisdem episcopo et priori mandavimus, super his, appellatione postposita, procedatis, nullis litteris obstantibus, si quae apparuerint, harum mentione non habita, a sede apostolica impetratae.

Datum Laterani, XI kalendas februarii, pontificatus nostri anno V.