26 mai 1212

Référence: Potthast, n° 4501.

Episcopo et capitulo Petragoricensibus mandat, ut magistrum I. De Veteri Morolio in fratrem et canonicum liberaliter admittant; alioquin episcopo, subdiacono suo archidiacono Xanctonensibus et priori Sulbisiensi mandabitur, ut eos ad id compellant. VII kal. junii, anno 15°.

Edition: Etienne Baluze, Epistolarum Innocentii III, romani pontificis, libri undecim accedunt, tomus primus, 1682, Liber XV, epistola 97.

François Bosquet, 1635, liber 15, n° 366.

Edition: Migne, Patrologie latine, 1855, CCXVI, 609, n° 97.

Mention : http://www.guyenne.fr/ArchivesPerigord/BNF/Tome30/BnF_tome30.htm (fol. 322 v°)

Ut I. de Veteri Morolio in canonicum recipiant.

Episcopo et capitulo Petragoricensi.

Si circumspectius curaretis advertere quantum sit obedientiae bonum, quantumve ipsius contrarium detestandum, utpote idolatriae sceleri comparatum, mandatum nostrum forsitan citius studeretis effectui mancipare, ut exuto veteri homine, vos in illius transformaretis imaginem qui usque ad mortem factus est obediens Deo patri, nec vos excusaretis exceptionibus frivolis in ejusdem elusionem mandati. Sane cum pro dilecto filio magistro I. de Veteri Morolio, qui diu cancellariae nostrae servitio laudabiliter insudavit, et laboravit multotiens pro ecclesiae vestrae negotiis promovendis, vobis direxerimus scripta nostra, ut ob reverentiam apostolicae sedis et nostram ipsum in canonicum reciperetis et fratrem, sibi stallum in choro et locum in capitulo assignantes, vos mandatum nostrum surdis auribus transeuntes, sicut dilecti filii prior Grandimontensis et G. archidiaconus et S. Mauricii canonicus Lemovicenses, quos eidem concessimus monitores, per suas nobis litteras intimarunt, quamquam vos monuerint diligenter, id efficere non curastis, per vestras litteras allegantes tenuitatem reddituum et canonicorum numerum competentem et de mandato nostro quosdam alios suscepisse ac praenominatum magistrum in diocesi vestra redditus alios obtinere, proponendo quod ad recipiendum eundem vos nullatenus cogeremus si haec ad nostram notitiam pervenissent ; licet monitores praefati de plurium assertione didicerint quod in ecclesia vestra canonicorum numerus non excesserat, quin potius alios proposueratis recipere in canonicos et in fratres, et praefatus magister redditus sufficientes non habeat, et ipsius obsequium ecclesiae vestrae possit existere fructuosum. Nolentes igitur exceptionibus frivolis mandatum nostrum eludi, universitati vestrae per apostolica scripta mandamus atque praecipimus quatinus eundem magistrum juxta mandati nostri tenorem in fratrem et canonicum ecclesiae vestrae liberaliter admittatis. Alioquin, cum sagitta Ionathae non debeat redire retrorsum, sed dirigi potius in directum, venerabili fratri nostro episcopo et dilectis filiis ... subdiacono nostro archidiacono Xanctonensi et priori Sulbisiensi Xanctonensis diocesis damus nostris litteris in praeceptis ut vos ad id, nisi aliquod rationabile objectum fuerit et ostensum quare id fieri non debeat vel non possit, per censuram ecclesiasticam appellatione remota compellant. Datum Laterani, VII kal. junii, pontificatus nostri anno decimoquinto.

In eundem fere modum scriptum est super hoc eisdem.