17 janvier 1235
Référence: pas dans Potthast.
Edition: Lucien Auvray, Les registres de Grégoire IX.
Recueil des bulles de ce pape publiées ou analysées d’après les manuscrits
originaux du Vatican, 1890, n. 2491.
Original: Reg. 18, fol. 10 r°, ann. IX.
Sinibaldi, tituli Sancti
Laurentii in Lucina presbyteri cardinalis, et Aegidii, Sanctorum Cosmae et
Damiani diaconi cardinalis, sententia in causa quae inter Matthiam Guidonis
Marron., civem Romanorum, ex una parte, et Bernardum Aniciensem episcopum, et Aniciensem
ecclesiam, ex altera, super quibusdam summis pecuniae vertebatur; qua sententia
pronuntiatur mille libras Pruvinensium de Senatu a procuratore praedicti
episcopi praedicto Matthiae Guidonis Marron. esse
solvendas.
In nomine Domini Nostri
Jhesu Christi. Amen. Anno Nativitatis ejusdem M° CC° XXXV, pontificatus domini
Gregorii pape VIIII anno octavo, indictione VIII, mense januarii, die XVII. Cum
causam que vertebatur inter Mathiam Guid[onis] Marron., civem Romanum, ex parte
una, et Bernardum, venerabilem episcopum, et ecclesiam Aniciensem, ex altera,
super mille quingentis et quinquaginta libris bonorum et legalium
Pruvinen[sium] Francie, et trecentis et quinquaginta marcis bonorum, novorum et
legalium sterlinguorum, in una parte, ac quadringentis et triginta quinque
libris bonorum et legalium Pruvinen[sium] Francie, pro sorte, et sexaginta
marcis bonorum, novorum et legalium sterlinguorum tredecim solidis et quatuor
sterlinguis pro marca qualibet computandis, pro dampnis et expensis, in altera,
super quibus omnibus petiit idem Mathias sententiam a bone memorie domino
Honorio papa et arbitrium a bone memorie Pelagio, quondam Albanensi episcopo,
lata pro se in solidum, executioni mandari, dominus papa nobis Signibaldo,
tituli Sancti Laurentii in Lucina presbitero, et Egidio, Sanctorum Cosme et
Damiani diacono cardinalibus, commiserit audiendam et ordine judiciario
finiendam: nos, intellecta petitione dicti Mathie et responsione dicti
episcopi, qui litem contestando respondit executionem pro dictam in dictis
summis fieri non debere, visis instrumentis, scripturis et probationibus,
intellectis confessionibus partium, cognitis quoque meritis totius cause, diu
lite protracta, facta renuntiatione a partibus super allegationibus tam juris
quam facti, ac postmodum utraque parte in nostra presentia cum instantia
sententiam postulante, pronuntiamus executionem in jamdictis summis usque ad
mille libras Pruvenien[sium] de Senatu esse faciendam; in reliquis autem summis
et quantitatibus executionem non esse faciendam nec fieri debere,
sententialiter diffinimus, a petitione quoque executionis reliquarum
quantitatum et summarum Willelmum de Podio, procuratorem dicti episcopi et
ecclesie Aniciensis, ipsius episcopi et ecclesie nomine, sententialiter
absolventes. Prolata est hec sententia ab eisdem dominis cardinalibus et eorum
sigillis roborata Perusii, in ecclesia Sancti Martini de Verzario, anno, mense,
die et indictione suprascriptis, prefato Mathia et Willelmo, procuratore
ejusdem domini episcopi et ecclesie Aniciendis, presentibus et testibus
subscriptis ad hoc specialiter rogatis, scilicet: domino Girardo, archidiacono
Segobiensi; Helia Raimundi, archidiacono Fontiniacensi; magistro Willelmo de
Abelens, canonico Petragoricensi; magistro Nicolao, canonico de Vinea Jannensi,
domini Senibaldi cardinalis capellano; magistro Aria, ejusdem domini Egidii
cardinalis capellano; magistro Johanne, canonico Peronensi; magistris Roffrido
de Benevento et Petro de Sancto Germano, domini pape Curie advocatis; Angelo
Johannis Clare, de Urbe; Jacobo Mancino, Romano; Hugnic[ione] Bonave[n]ture et
Martell., mercatoribus Senensibus; Johanne de Monacho et Gonsalvo, familiaribus
domini Egidii cardinalis. Ego Rain[erius], Dei gratia
Sacri Romani Imperii scriniarius, habens potestatem dandi tutores [et]
curatores, emancipandi, decretum interponendi, alimenta decernendi et
publicationem testium faciendi, quia prolationi dicte sententie interfui, de
mandato dictorum dominorum cardinalium in publicam formam redegi omnia
suprascripta. Quam sententiam idem Mathias et prefatus procurator spontanee
acceptarunt.
Nulli ergo [etc.] nostre
confirmationis etc. Si quis autem etc. Datum Perusii, III kalendas aprilis,
anno nono.