16 avril 1235

 

Référence: pas dans Potthast.

Edition: Lucien Auvray, Les registres de Grégoire IX. Recueil des bulles de ce pape publiées ou analysées d’après les manuscrits originaux du Vatican, 1890, n. 2510.

Original:  Reg. 18, f. 14 v°; ann. IX, c. 22.

Copie: mss. Laporte du Theil, Collection Moreau, vol. 1190, f. 274, Bibliothèque nationale de France.

Copie: http://www.guyenne.fr/ArchivesPerigord/BNF/Tome30/BnF_tome30.htm (fol. 370 r°)

 

 

Episcopo Petragoricensi et abbatibus de Moroillis et de Vadacio mandat quatenus, cum decanus Pictavensis et thesaurarius Turonensis, votis eligentium in duas partes divisis, in episcopum Pictavensem electi fuissent, illius electionis negotium instruante et instructum ad sedem apostolicam remittant.

 

... episcopo Petragoricensi, ... de Moroill[is], Cisterciensis et ... de Vadacio, sancti Augustini ordinum, Pictavensis et Cenomanensis diocesum. [abbatibus].

Pastoris solacio Pictavensi ecclesia destituta, cum ... decanus ecclesie Pictavensis et ... Turonensis thesaurarius, canonicus ejusdem ecclesie, divisis in duas partes votis canonicorum ipsius, electi fuerint ad eandem, nos dilectis filiis Johanni, subdiacono nostro, preposito et Oddoni, archidiacono Cenomanen[sibus], ecclesie predicte canonico, qui pro electione ... thesaurarii, et ... subdecano et Gaufrido de Mauriaco, canonico Pictaven[sibus], qui pro electione sui decani ad nostram presentiam accesserunt, audientiam prebuimus liberam et benignam; et, auditis que hinc inde proponere voluerunt, electionem decani, longe a minori parte medietatis capituli celebratam, effectum decrevimus aliquem non habere, eum nec illi qui pro eadem electione venerant, nec decanus insistere vellent eidem; quinimmo ex parte ipsius fuit suppliciter postulatum ut de alio provideremus ecclesie supradicte. Porro, cum pars altera thesaurarii electionem, utpote a multo majori parte totius capituli factam de ipso, instanter peteret confirmari, [...] subdecanus et Gaufridus de Mariet, ipsius ecclesie canonici, licet pro aliis, qui secum decanum elegerant, mandatum ad hoc sufficiens non haberent, se tamen confirmationi petite suo nomine opponentes, tam per se ipsos quam per magistrum Petrum, procuratorem suum, datum ad id prosequendum, excipiendo contra personam thesaurarii objecerunt quod idem, patiens in litterarum defectum, plura beneficia curam animarum habentia, contra constitutionem generalis concilii, sine dispensatione apostolica retinere presumit, in vestibus et multis aliis que clericali honestati non conveniunt, excedendo. Proposuerunt preterea per confederationes quasdam et tractatus illicitos, intervenientibus quoque machinationibus, minis et terroribus, ad electionem ejusdem fuisse processum, licet extiterit antea ne quid contra formam juris fieret, appellatum. Multi etiam de parte thesaurarii, interrogati si eum novissent, quem in scrutinio nominaverant, responderunt quod ipsum non noverant, sed necesse haberent id facere, quoniam eorum domini hoc volebant. Quocirca, de procuratorum utriusque partis assensu, mandamus quatenus, convenientes in competenti loco diocesis Pictavensis, civitati Pictavensi propinquo, vocatis qui fuerint evocandi, de studiis eligentium et meritis electionis de thesaurario celebrate, ac ideoneitate persone nec non de objectis cognita veritate, negotium ad nos remittatis sufficenter instructum, injungentes electo ut personaliter, aliis vero qui se duxerint opponendos, ut per se vel procuratorem idoneum, infra certum terminum prefigendum a vobis, nostro se conspectui representent, quod canonicum fuerit, actore Domino, recepturi. Quod si non omnes etc., duo vestrum etc. Datum Perusii, XVI kalendas maii, anno nono.