15 septembre 1254
Edition : Elie Berger, Les registres d’Innocent IV publiés ou analysés d’après les manuscrits originaux du Vatican et de la bibliothèque nationale, 1884-1921, n° 8009.
Original : Reg., an. XII, n°
192, fol. 170 v°.
Copie : La Porte du Theil, fol. 322.
Copie : http://www.guyenne.fr/ArchivesPerigord/BNF/Tome30/BnF_tome30.htm
(fol. 406 r°).
Episcopus Agennensis episcopi
Petragoricensis cessionem recipiat, faciatque ut ei congrua provisio
assignetur.
... episcopo Agennensi.
Significavit nobis venerabilis
frater noster ... Petragoricensis episcopus quod, cum dudum et frequenter pro
sua cessione apud sedem apostolicam institisset, tandem ad venerabilem fratrem
nostrum ... archiepiscopum Burdegalensem, metropolitanum suum, litteras nostras
obtinuit, continentes ut cessionem ejus reciperet si expedire videret. Sane
dicto archiepiscopo, tum propter graves infirmitates suas, tum propter
vexationes nimias, quibus in sua diocesi perturbatur, nostrum in hac parte
mandatum exequi nequeunte, idem episcopus non absque multis gemitibus et
suspiriis usque nunc sua remansit intentione frustratus. Quia vero ipse propter
diutinas et incurabiles infirmitates suas illam incurrit debilitatem corporis,
quod non potest curam exequi officii pastoralis, unde sibi et anime periculum,
et sue timet ecclesie inminere multiplex detrimentum, nos, precum ipsius nimia
importunitate devicti, fraternitati tue, de cujus industria gerimus in Domino
fiduciam specialem, per apostolica scripta mandamus quatinus, si premissis
veritas suffragatur, vice nostra sepedicti episcopi recipias cessionem, ac sibi
de bonis episcopalibus juxta sufficientiam facultatum ipsius ecclesie
provisionem [facias] congruentem assignari, contradictores, etc.; non obstante
si alicui persone, loco vel dignitati de partibus illis a sede apostolica sit
indultum quod interdici vel suspendi aut excommunicari non possint, nisi de
indulto hujusmodi sibi concesso plena et expressa seu de verbo ad verbum in
nostris litteris mentio habeatur. Datum Anagnie, XVII kalendas octobris, anno
XII°.