23 décembre 1255

 

 

Edition : MM. Bourel de La Roncière, J. de Loye et A. Coulon, Les registres d’Alexandre IV, Recueil des bulles de ce pape publiées ou analysées d’après les manuscrits originaux des archives du Vatican, 1895.

Original : Reg. 24, f. 126 v°, ann. II, c. 15.

 

 

Archidiacono Lesatensi, Tolosanae diocesis, mandat quatinus archipresbyteratum de Goz, Petragoricensis diocesis, cui subsunt viginti et plures ecclesiae, in statum pristinum revocare procuret, non obstante unione ejus cum prioratu de Paraco.

 

... archidiacono Lesatensi, Tholosane diocesis. Ex parte dilectorum filiorum conventus ecclesie de Paraco, ordinis sancti Augustini, Petragoricensis diocesis, fuit propositum coram nobis, quod, cum olim eadem ecclesia priore vacaret, is qui tunc erat archipresbiter ecclesie de Goz, ejusdem ordinis et diocesis, prioratui ipsius ecclesie immediate subjecte electus et confirmatus extitit in priorem ecclesie memorate; sed loci diocesanus, gerens ad personam electi prefati private dilectionis allectum, archipresbiteratum dicti loci de Goz univit auctoritate propria prioratui ejusdem ecclesie de Parato (sic) in gravem predicte ecclesie de Goz dispendium et jacturam, quod redditus prioratus ipsius essent tenues et exiles, in hujusmodi unione contingens et felicies recordationis I. papa predecessor noster, prescriptione confectionis hujusmodi circumventus, unionem ipsam in forma communi dicitur confirmasse. Cum igitur, sicut accepimus, idem archipresbiteratus magni hominis et fame celebris in illis partibus habeatur, utpote cui subsunt viginti et plures ecclesie curam animarum habentes ac consuete ab ipsius loci archipresbitero visitari et plures ibi consueverint residere regulares canonici et multi clerici seculares virtutum Domino famulantes, ubi post unionem predictam moratur tantummodo unus solus, clerici etiam et parrochiani dictarum ecclesiarum quasi absque capite non habeant ad quem recurrant in spiritualibus, a quo refici valeant pabulo verbi Dei, et per hoc tam eedem ecclesie quam dictus archipresbiteratus patiantur defectum non modicum in divinis et aliis ad curam pertinentibus animarum, mandamus quatinus, si tibi constiterit de premissis, unione ac confirmatione predictis nequaquam obstantibus, predictam ecclesiam de Goz in statum pristinum legitime revocare procures, faciens eam per illos ad quos pertinet, prout hactenus fieri consuevit, canonice ordinari, de archipresbitero et personis aliis ibidem Domino regulariter servituris. Contradictores etc. Datum Laterani, X kalendas januarii, anno secundo.