8 mars 1142

Le pape Innocent II confirme à Lambert, évêque d’Angoulême, les possessions et droits de son église.

 

Référence : 8207

Ecclesiae Engolismensis tutelam suscipit et possessiones confirmat, petente Lamberto episcopo. Pflugk-Harttung Acta II. 323. — « Ex commisso nobis ».

Edition : Acta pontificum romanorum inedita, II, Urkunden der papste vom jahre 748 bis zum jahre 1197, J. v. Pflugk-Harttung, 1884 (N. 362)

Copie : Extrait du fonds Vaticani Ottoboniani, 687, p. 10, dans la bibl. Vaticana de Rome.

 

 

Innocentius episcopus, servus servorum Dei, venerabili fratri Lamberto, Engolismensi episcopo, ejusque successoribus regulariter substituendis, in perpetuum. Ex commisso nobis a Deo offitio fratres nostros episcopos debemus diligere et ecclesiis, in quibus domino militere noscuntur, suam justiciam conservare. Eapropter, dilecte in Christo frater, L(amberte) episcope, preces tuas rationabiles clementer admittimus, et commissam tibi a Deo Engolismensem ecclesiam sub beati Petri et nostra protectione suscipimus et presentis scripti privilegio communimus. Statuentes, ut quascumque possessiones, quecumque bona in presentiarum juste et canonice possidet aut in futurum rationabilibus modis Deo propitio poteris adipisci, firma tibi tuisque successoribus et illibate permaneant. In quibus hec propriis duximus exprimenda vocabulis : ecclesiam Beate Marie de Aent cum decima, et ecclesiam de Brenac, ecclesiam de Borno. Concordiam vero, que de ecclesia beati Simphoriani de Maonac inter canonicos Engolismensis ecclesie et canonicos de Salis per te, frater L(amberte) episcope, ac fratres nostros Vuillelmum Petragoricensem et Guillelmum Xantonensem episcopos rationabiliter facta est, ratam et inconvulsam manere sancimus. Decernimus ergo, ut nulli omnino hominum liceat, prefatam Engolismensem ecclesiam temere perturbare aut ejus possessiones auferre vel ablatas retinere, minuere seu quibuslibet vexationibus fatigare, sed omnia integra conserventur eorum, pro quorum gubernatione et sustentatione concessa sunt, usibus omnimodis profutura. Si qua igitur in futurum ecclesiastica secularisve persona, hujus nostre constitutionis paginam sciens, contra eam temere venire temptaverit, secundo terciove commonita, si non satisfactione congrua emendaverit, potestatis honorisque sui dignitate careat, reamque se divino juditio existere de perpetrata iniquitate cognoscat, et a sacratissimo corpore ac sanguine Dei et Domini nostri redemptoris Jesu Christi, aliena fiat, atque in extremo examine districte ultioni subjaceat. Cunctis autem eidem loco justa servantibus, sit pax domini nostri Jesu Christi, quatinus et hic fructum bone accionis percipiant et apud districtum judicem premia eterne pacis inveniant. Amen. Amen. Amen.

Ego Innocentius catholice ecclesie episcopus ss.

Ego Albericus Hostiensis episcopus ss.

Ego Guido sancte Romane ecclesie indignus sacerdos ss.

Ego Martinus presbiter cardinalis tit. Sancti Stephani ss.

Ego Gregorius presbiter cardinalis tit. Calixti ss.

Ego Goizo presbiter cardinalis tit. Sancte Cecilie ss.

Ego Gregorius diaconus cardinalis Sanctorum Sergii et Bachi ss.

Ego Guido diaconus cardinalis Sanctorum Cosme et Damiani ss.

Datum Laterani, per manum Gerardi, sancte Romane ecclesie presbiteri cardinali ac bibliothecarii, VIII idus martii, indictione V, anno Dominice Incarnationis MCXLI, pontificatus vero domni Innocentii II pape anno tercio decimo.