7 juin 1162

Résumé à définir.

Mention de l’évêque de Périgueux.

Référence : Jaffé-Loewenfeld, 10729

S(yro) archiepiscopo et universo clero ac populo Januensi nuntiat, sese eorum cancellario ad pacem inter eos et (Raymundum) comitem S. Aegidii conciliandam misso consilium auxiliumque praebuisse: apud Montepessulanum sese honorifice receptum esse. De excommunicatione in Octavianum heresiarcham et Fridericum eorumque fautores prolata eadem fere, quae supra ep. 10719, scribit. Petrum, fratrem (Ludovici) regis Francorum die 17. m. Mai., ac postea Bituricensem archiepiscopum et Claromontensem, Petragoricensem, Cadurcensem, Carnotensem et Nemausensem episcopos atque electum Ovetensem, quem d. 20. Maii consecraverit, a sese receptos esse, itemque Hen(ricum) et W(illelmum) cardinales cum episcopo Ebroicensi et aliis nuntiis regis Anglorum. Remensi archiepiscopo pallium missum esse. B(osonem), diaconum cardinalem SS. Cosmae et Damiani commendat. Pflugk-Harttung, Acta, II, 366. — « Sincera vestre fidei ».

Edition : Acta pontificum romanorum inedita, II, Urkunden der papste vom jahre 748 bis zum jahre 1197, J. v. Pflugk-Harttung, 1884 (N. 416)

Copie : Miscell. di Stor. Ligur. V, p. 190, Bibl. Civica de Gênes.

Original : Archivio di Stato à Milan.

 

Alexander episcopus, servus servorum Dei, venerabili fratri S(yro) archiepiscopo et dilectis filiis archidiacono, preposito, canonicis, consulibus et universo clero ac populo Januensi saluterm et apostolicam benedictionem. Sincera vestre fidei constant[ia], pure affectionis devotio, quam erga sacrosanctam Romanam ecclesiam et specialiter erga personam nostram plurimis rerum effectibus exhibuist[is], nos ad amorem vestrum serventius inducunt et, ut de profectibus vestris, tanquam de propriis, sollicitemur, invitant modis omnibus et hortantur. U[nd]e litteris vestre integritatis, a nobis hylari mente susceptis, dilecto filio nostro, cancellario vestro, qui ad pacem inter vos et comitem Sancti Egidii et homin[es] vos pro illis offensis, quas vobis intulerant, reformandam, a vobis fuerat destinatus, consilium et auxilium, sicut ipse plenius vobis narrare poterit, quantum divina gratia nobis contulit, efficaciter impertivimus, in eo animo et voluntate firmius exsistentes, ut ad honorem, commodum et exaltationem vestram et civitatis vestre affluentiori caritate debeamus omni tempore non inmerito aspirare, et vestram commendabilem devotionem pectori nostro infixam memoriter retiner. Statum autem ejusdem ecclesie ac nostrum tanto vobis libentius aperimus, quanto magis vos circa eum prosperari et plurimum gaudere atque sollicitos esse aperte cognoscimus. Noverit ergo vestre dilectionis discretio, quod tam nos, quam fratres nostri apud Montem Pessulanum, ubi honestissime fuimus per Dei gratiam cum plenissima reverentia et celeberrima omnium devotione recepti, sani as presens et incolumes commoramur atque ab archiepiscopis, episcopis, regibus, principibus et universa occidentali ecclesia honoramur propensius et devotissime veneramur. Specialiter autem fratres nostros Senonensem, Turonensem, Aquensem et Narbonensem archiepiscopos, de quibus unum, Narbonensem videlicet, in eadem terra consecravimus, et Autisiodorensem, Macloviensem, Eduensem, Nivernensem, Morinensem, Magalonensem et Tolonensem episcopos de regno Francorum recepimus, cum quibus in die Ascensionis Domini publice excommunicationis sententiam in illum heresiarcham Oct(avianum), et Fred(ericum), ecclesie persecutorem, atque in omnes eorum complices promulgavimus. Ibi etiam eodem die dilectum filium nostrum Petrum, fratrem illustris Francorum regis, et postea venerabiles fratres nostros, Bituricensem archiepiscopum, et Claromontensem, Petragoricensem, Caturcensem, Carnotensem et Nemausensem episcopos atque Ovetensem electum suscepimus, cui sequenti dominica post festum Ascensionis munus consecrationis inpendimus. Ibidem quoque dilectos filios nostros Hen(ricum) et W(ilhelmum), Romane ecclesie cardinales, cum venerabili fratri nostro, Ebroicensi episcopo, et aliis quibusdam nuntiis illustris Anglorum regis nos noveris recepisse. Remensi quoque archiepiscopo pallium nuper transmisimus, firmam spem fiduciamque tenentes, quod summe divinitatis clementia pacem et tranquilitatem ecclesie sue sancte celeriter indulgebit. Quocirca discretionem vestram per apostolica scripta rogamus, monemus et exhortamus in domino, quatinus, sicut bene cepistis, ita vos ipsos et alios exemplo vestro in devotione beati Petri ac nostra confortetis, quod vestre sinceritatis constantia cum gratiarum actione debeat a nobis omni tempore commendari. Ad hec vos, dilecti filii consules, attente rogamus, ut dilectum filium nostrum B(osonem), sanctorum Cosme et Damiani diaconum cardinalem, quem pro negotiis vestris utiliter agendis in partibus illis duximus reliquendum, cum ea honorificentia ad nos faciatis secure deduci, ut ex hoc devotionem vestram possimus non inmerito commendare. Datum apus Montem Pessulam, VII idus junii.