18 juin 1210

Référence: Potthast, n° 4017.

S. Mariae Dolensis et S. Johannis Angeliacensis abbatibus Bituricens. et Xanctonens. dioc. et archidiacono Bituricensi mandat, ut (Willelmo) archiepiscopo Burdegalensi et (Mauritio) episcopo Pictavensi convocatis ac eorum rationibus plenius auditis, si de partium voluntate processerit, causam fine canonico decidant; alioquin praefigant partibus terminum, quo se sedi apostolicae repraesentent judicium recepturae. XIV kal. julii, anno 13°.

Edition: Etienne Baluze, Epistolarum Innocentii III, romani pontificis, libri undecim accedunt, tomus primus, 1682, Liber XIII, epistola 93.

Edition: François Bosquet, liber 13, n° 97.

Edition: Migne, Patrologie latine, 1855, CCXVI, 287, n° 93.

Adversus eundem episcopi.

Eisdem.

Significante venerabili fratre nostro Burdegalensi archiepiscopo nos accepisse noscatis quod cum venerabili fratri nostro Pictavensi episcopo suffraganeo suo ad querelam subditorum ipsius poena suspensionis adjecta inhibere curasset ne pecuniarias procurationes ab ecclesiis quas non visitabat exigeret, vel collectas majores quam praedecessores sui facere consueverant, in subditis sibi ecclesiis exerceret, idem, ejus inhibitione contempta, et pecuniam pro procurationibus et collectas solito majores exegit, suspensionis sententiam, in quam propter hoc incidit, non observans. Ad expellendum quoque ruptarios et Bramantiones de Burdegalensi provincia sibi auxilium, prout praestita fide promiserat, non impendit, inhibens et impediens ne ipse Pictavensem diocesim ex officio suo visitans procurationibus consuetis et debitis honoretur. Clericos quoque quos dictus archiepiscopus ad praesentationem vicarii sui, eodem episcopo non existente in diocesi, ordinarat, ab ordinum susceptorum ab eo executione suspendit, nec voluit ad mandatum ipsius eandem suspensionis sententiam relaxare, sententias excommunicationis ab eodem episcopo in subditos suos latas, quas idem archiepiscopus auctoritate metropolitana justitia exigente confirmat, eo inconsulto, nullaque super hoc obtenta potestate, relaxans. Quandam insuper pecuniae quantitatem ab Helia praedecessore suo mutuatam episcopo Pictavensi et in ultima ejus voluntate ad fabricam Burdegalensis ecclesiae deputatam sibi restituere contradicit, in his et multis aliis contra juramentum Burdegalensi ecclesiae ac praedecessori suo praestitum temere veniendo. Ex parte vero ipsius episcopi fuit propositum ex adverso quod intrans idem archiepiscopus annis singulis pluries diocesim Pictavensem non vocatus ab eo vel a terrae principe invitatus, nullaque necessaria causa tractus a suis subditis frequentius debito, de leuga fere in leugam dietas faciens, exigit procurari, correctiones tamquam ordinarius faciens per totam diocesim Pictavensem, in qua ipse, praeter ordinariam, delegatam a nobis super correctionibus obtinet potestatem. Sententias quoque in raptores et alios qui injuriantur ecclesiis vel personis ecclesiasticis, sive illis qui sub ecclesiae protectione consistunt, ab eo exigente justitia promulgatas, juris ordine praetermisso relaxans, tractat causas in eadem diocesi et committit, licet ad eum non fuerit appellatum. Qui, eo quondam apud sedem apostolicam existente, ad ecclesiam Pictavensem accedens, et in ejus et subditorum suorum gravamen procurationes ibidem recipiens, quosdam diocesis suae clericos, licet super hoc ab eo mandatum non habuerit, ordinavit. Et licet componentibus inter eos venerabili fratre nostro Nannetensi episcopo et decano Pictavensi aliisque pluribus, idem archiepiscopus promisisset quod nihil unquam contra eum vel honorem suum machinari de cetero attentaret, nisi forsan ipsi primitus requisiti terminare non possent si quid adversus eum proponeret quaestionis, multa tamen, contra compositionem eandem et promissionem suam temere veniens, in ejus et honoris sui dispendium attentavit, super his et aliis injuriosus existens eidem plurimum et molestus. Quia vero nobis non constitit de praemissis, discretioni vestrae de procuratorum utriusque partis assensu per apostolica scripta mandamus quatinus competenti loco partibus convocatis, et rationibus hinc inde plenius auditis et cognitis, si de partium processerit voluntate, causam ipsam appellatione remota sine canonico decidatis et faciatis quod decreveritis per censuram ecclesiasticam firmiter observari. Alioquin eandem sufficienter instructam ad nostram praesentiam remittentes, praefigatis partibus terminum competentem quo nostro se conspectui repraesentent recepturae judicium aequitatis. Testes autem qui fuerint nominati, si se gratia, odio, vel timore subtraxerint, per censuram eandem appellatione remota cogatis veritati testimonium perhibere. Nullis litteris obstantibus, si quae apparuerint a sede apostolica praeter assensum partium impetratae. Quod si non omnes etc. duo vestrum ea etc. Datum Laterani, XIV kal. julii, pontificatus nostri anno tertiodecimo.