7 août 1216

 

Référence: Potthast, n° 5325.

Edition: Bouquet, Recueil des historiens des Gaules et de France, 1833, vol. XIX, p. 610.

Edition: Horoy, Medii Aevi bibliotheca patristica, Series Prima, tomus II, Honorii III, 1879, n° XI.

Notice: Petrus Pressutti, Regesta Honorii papae III, jussu et munificentia Leonis XIII pontificis maximi, ex Vaticanis archetypis, aliisque fontibus edidit, 1888, n° 14.

(Odoni) Duci Burgundie.

Scribit ut sicut vir prudens constans et strenuus ad praefate Terre Sancte succursum sic potenter et viriliter te accingas transfretaturus in passaggio in concilio definito … quod exemplo tui, alii excitati ad idipsum fortiter animentur.

Perusii, VII id. augusti, anno primo.

Original: Reg. vat. lib. I, epist. 8, fol. 2. – Illa conditoris.

Copie: http://www.guyenne.fr/ArchivesPerigord/BNF/Tome30/BnF_tome30.htm (fol. 326 r°)

 

 

Ad ducem Burgundiae (1)

 

Honorius III, ducem Burgundiae, cunctantem monet et exhortatur ut, quum affixerit humeris suis signum crucis ad Terrae Sanctae subsidium profecturus, iter Hierosolymitanum aggrediatur et suo exemplo alios crucesignatos principes ad idipsum impellat.

 

Honoris episcopus, servus servorum Dei, dilecto filio nobili viro duci Burgundiae salutem, etc.

Illa conditoris immensitas bonitatis quae, ut servum redimeret, in mortem tradidit filium, suae miserationis affectum circa nos non desinens operari, ut apud nos, quod sibi possimus retribuere pro omnibus quae ipse nobis retribuit, habeamus, terram illam in qua nostram dignatus est operari salutem, ab infidelibus providentia ineffabili occupari permisit, quatenus instantes ad liberationem illius, quam posset eruere de illorum manibus solo verbo, juxta propriae devotionis affectum, non solum suorum peccaminum veniam, verum etiam in retributione justorum praemium mereantur. Et quoniam non est volentis neque currentis suae miserationis clementia, quae tangit montes, et fumigant, corda fidelium excitat ad idipsum sua praeveniendo gratia ut incipiant, et eadem ut perficiant prosequendo. Cum ergo, gratia divina praeventus, affixeris tuis humeris signum crucis ad ejus Terrae Sanctae subsidium profecturus, ut assumpto calice salutari retribuas Domino temetipsum; miramur quamplurimum quod neque bonae memoriae Innocentium papam praedecessorem nostrum, neque nos ipsos, super passagio et apparatu navium requisisti, nec curasti exponere quid super his tuae sedeat voluntati cum in generali concilio ad transfretandum determinatum fuerit tempus certum. Expedit enim te ac alios principes crucesignatos per quod negotium crucis posse creditur promoveri, sic esse paratos, ut in vos tanquam in cedros Libani possint quasi passeres nidificare minores, qui ad montes oculos suos levant, ab eis divinum auxilium exspectantes.

Volentes igitur ut tu, quasi lucerna super candelabrum posita, lumen aliis praebeas per exemplum, nobilitatem tuam rogamus attente et monemus, et exhortamur in Domino, in remissionem tibi peccaminum injungentes, quatenus, sicut vir prudens, constans et strenuus, ad praefatae Terrae succursum sic potenter et viriliter te accingas, transfrataturus in passagio in praefato concilio diffinito, et votum redditurus Domino quod vovisti; quod exemplo tuo alii excitati ad idipsum fortius animentur et tibi ex hoc cumulus aeternae retributionis accrescat. Quicquid autem super his facere disposueris vel videri expedire, nobis plane tuis litteris non differas intimare. Datum Perusii, VII idus augusti, anno pontificatus nostri primo.

 

(1) Odoni III.

 

In eundem modum, comiti Marchiae (Hugoni IX de Leziniaco), et quibusdam aliis nobilibus crucesignatis per regnum Franciae constitutis.

Item nobili viro comiti Barri super Sequanam (Miloni III).

Item duci Brabantiae (Henrico I, comiti Antuerpiae).

Item comiti Autissiodorensis (Ervisio de Giemaho et Donziaco).

Item Simoni de Jovisvilla, senescallo Campaniae.

Item comiti Suessionensi (Radulpho III de Nigella).

Item Drog. de Merlo (Dreux, Franciae constabulario).

Item Gualterio de Avesnis.

Item Bisuntino archiepiscopo (Amedeo de Tremelay).

Item Remensi archiepiscopo (Alberico de Altovillari).

Item Burdegalensi archiepiscopo (Guillelmo Amanevi).

Item episcopo Petragoricensi (Ramnulpho de las Tours).

Item episcopo Trecorensi (Gaufrido Loix).

Item episcopo Bajocensi (Roberto de Ableges).

In eundem modum quibusdam aliis episcopis singulatim.