4 octobre 1258

Edition : MM. Bourel de La Roncière, J. de Loye, P. de Cenival et A. Coulon, Les registres d’Alexandre IV, Recueil des bulles de ce pape publiées ou analysées d’après les manuscrits originaux des archives du Vatican, , 1917, n° 2691.

Original : Reg. 25, f. 158 v°, ann. IV, c. 217.

Episcopo Petragoricensi mandat ut, non obstante capituli ecclesie oppositione, Ramnulphum archipresbyterum de Veteri Marolio, Lemovicensis diocesis, in Petragoricensi ecclesia recipi eique de proventibus debitis provideri faciat.

... episcopo Petragoricensi. Significavit nobis Ramnulphus, archipresbiter de Veteri Marolio, rector ecclesie de Subterranea, Lemovicensis diocesis, quod olim felicis recordationis Innocentius papa, predecessor noster, tibi faciendi recipi in Petragoricensi ecclesia dictum R. in canonicum et in fratrem, et providendi sibi de proventibus ipsius ecclesie, sicut unum ex aliis canonicis ipsius ecclesie, si tibi et majori parti ejusdem capituli placeret, necnon et contradictores per censuram ecclesiasticam, appellatione postposita, compescendi, non obstante partis contradictione minoris, liberam sub certa forma concessit per suas litteras facultatem, vel si predecessor ipse in eadem ecclesia pro aliis direxerat scripta sua, aut quod dictus R. alias beneficiatus existit, vel si personis ejusdem ecclesie foret ab Apostolica Sede indultum quod ad receptionem alicujus minime tenerentur, seu quod excommunicari, suspendi vel interdici non possent per litteras dicti Sedis, nisi plena et expressa in eis de indulto hujusmodi mentio haberetur. Verum cum a te capitulo ecclesie supradicte ut eundem R. reciperent, fuissent plures termini assignati, ex parte ipsorum responsum extitit quod prefatum R. nullatenus reciperent, nisi superveniret coactio quam evitare non possent, licet contra personam ipsius nichil duxerint proponendum; propter quod dictus R. de gratia ipsa nullum adhuc comodum reportavit. Quocirca fraternitati tue per apostolica scripta in virtute obedientie districte precipiendo mandamus quatinus, veris existentibus supradictis, ipsum in eadem ecclesia recipi in canonicum et in fratrem, et de proventibus ipsius ecclesie sicut uni ex aliis ejusdem ecclesie canonicis, ei per te vel alium facias provideri. Non obstante si pro aliis in eadem ecclesia direximus scripta nostra quibus nullum auctoritate presentium prejudicium generari (1), vel si eidem capitulo a Sede Apostolica sit indultum quod ad receptionem vel provisionem alicujus per litteras dicte Sedis minime teneantur, vel quod interdici, suspendi vel excommunicari non possint per litteras Sedis ejusdem aut qualibet indulgentia ipsius Sedis generali vel speciali cujuscumque tenoris existat, per quam presentibus non expressam vel totaliter non insertam effectus presentium quomodolibet impediri valeat vel differri, aut quod idem R. alias beneficiatus existit. Contradictores etc. Datum Viterbii, IIII nonas octobris, anno quarto.

(1) Il manque ici un mot tel que volumus.