12 octobre 1263

 

 

Edition : Jean Guiraud, Les registres d’Urbain IV (1261-1264) - Recueil des bulles de ce pape publiées ou analysées à partir du Registre ordinaire, 1901-1904, n° 2200.

Mention : http://www.guyenne.fr/ArchivesPerigord/BNF/Tome30/BnF_tome30.htm (fol. 415 v°)

Original : Reg. 29, fol. 232, n° 1249.

 

 

Decano ecclesiae s. Hilarii Pictavensis mandat ut Guillelmum Petri, canonicum secularis ecclesiae s. Frontonis Petragoricensis, ecclesiam parrochialem s. Leodegarii prope Metulum, Pictavensis diocesis, resignare paratum, in ecclesia Petragoricensi in canonicum recipi faciat.

 

Decano sancti Ylarii Pictavensis. Sedis apostolice benignitas. Attendentes siquidem nobilitatem morum et generis ac litterarum scientiam quibus pollere dicitur dilectus filius Guillelmus Petri, canonicus secularis ecclesie sancti Frontonis Petragoricensis, ac per hoc volentes eum prosequi gratiose, discretioni tue mandamus quatenus eidem, ecclesiam parrochialem sancti Leodegarii prope Metulum, Pictavensis diocesis, quam obtinet, resignare parato, in Petragoricensi ecclesia, in qua prebendarum collatio ad venerabilem fratrem nostrum ... episcopum, et dilectos filios capitulum Petragoricenses communiter spectare dicitur et in qua certus canonicorum numerus et prebendarum distinctio, sicut asseritur, non existunt, dummodo, in ea non direxerimus specialiter scripta nostra pro alio, auctoritate nostra per te vel alium de canonicatu et prebenda providere procures, faciens eum recipi vel procuratorem suum, ejus nomine, in ipsa in canonicum et in fratrem, sibi stallo in choro et loco in capitulo, cum plenitudine juris canonici, assignatis, non obstante quod idem alias beneficiatus existit. Contradictores auctoritate nostra etc. usque compescendo. Proviso quod idem canonicus, cum in prefata ecclesia Petragoricensi receptus fuerit et prebendam pacifice assecutus, dictam parrochialem ecclesiam, quam ex tunc vacare decernimus, omnino dimittat et quod ipse, sicut requiret onus prebende quam eum auctoritate presentium obtinere contigerit, ad ordines statutis temporibus se promoveri faciat et personaliter resideat in eadem. Alioquin hujusmodi gratia nullius penitus sit momenti. Datum apud Urbemveterem, IIII idus octobris, anno tertio.