18 octobre 1263

Edition : Jean Guiraud, Les registres d’Urbain IV (1261-1264) - Recueil des bulles de ce pape publiées ou analysées à partir du Registre ordinaire, 1901-1904, n° 1477.

Original : Reg. 29, fol. 138 v°, n° 527.

Copie : http://www.guyenne.fr/ArchivesPerigord/BNF/Tome30/BnF_tome30.htm (fol. 415 v°)

Abbati de Leyrac, Tolosanae diocesis, capellano apostolico, mandat ut Petrum de Ulmis in ecclesia Petragoricensi in canonicum recipi faciat eique de praebenda provideat.

... abbati de Leyrac, capellano nostro, Tholosane diocesis. Dilectus filius Petrus de Ulmis, pauper clericus, in nostra proposuit presentia constitutus quod felicis recordationis Alexander papa, predecessor noster, venerabili fratri nostro ... episcopo, et dilectis filiis ... decano et capitulo Petragoricensibus, per suas litteras sub certa forma preces et mandata direxit eisque in virtute obedientie districte precepit ut ipsum clericum, nullum, ut asserit, ecclesiasticum beneficium assecutum, in Petragoricensi ecclesia, in qua non est certus canonicorum numerus nec distinctio prebendarum, recipientes in canonicum et in fratrem, ei de proventibus ipsius sicut uni ex aliis ejusdem ecclesie canonicis providerent. Et tandem, eisdem episcopo, decano et capitulo id efficere non curantibus. Petro Galteri, canonico ecclesie s. Juniani, Lemovicensis diocesis, per alias litteras suas injunxit ut dictum Petrum in eadem Petragoricensi ecclesia per se vel per alium in canonicum et in fratrem recipi ac ei de proventibus ipsius ecclesie, sicut uni ex aliis ejusdem canonicis, si ad id ejus facultates suppeterent, faceret, juxta priorum litterarum continentiam, provideri. Contradictores etc. usque compescendo. Verum dicto predecessore viam universe carnis ingresso, dictus clericus nullum est ex prefatis litteris commodum assecutus, super quo idem Petrus ad nostram duxit providentiam recurrendum. Nos igitur, obtentu dilecti filii nostri A., basilice duodecim Apostolorum presbyteri cardinalis, nobis super hoc supplicantis, volentes dicto clerico in hac parte gratiam facere specialem, mandamus quatenus, si est ita et non nisi pro duorum aliorum receptione nostras litteras direximus specialiter in ecclesia supradicta, ad receptionem et provisionem prefati clerici per te vel per alium, auctoritate nostra, procedas, secundum predictarum continentiam litterarum eidem canonico directarum. Non obstante si ... Contradictores etc., usque compescendo. Datum apud Urbemveterem, XV kalendas novembris, anno tertio.