19 avril 1265

Edition : Edouard Jordan, Les registres de Clément IV (1265-1268) – Recueil des bulles de ce pape publiées ou analysées d’après les originaux des archives du Vatican, 1893, n° 28

Original : fol. 6 v°, an. I, n° 26

Copie: http://www.guyenne.fr/ArchivesPerigord/BNF/Tome30/BnF_tome30.htm (fol. 421 r°).

Mandat ei, ut si causas ab episcopo Petragoricensi propositas veras esse invenerit, ejus cessionem de episcopatu admittat.

... episcopo Agennensi.

Lecta coram nobis venerabilis fratris nostri ... Petragoricensis episcopi petitio continebat quod cum ipse, propter suorum malitiam subditorum, ac nimiam debilitatem sui corporis, quam sibi peperisse noscuntur frequentes infirmitatum incursus, et infesta proprietas senectutis, nequeat ut expedit exequi officium pastorale, propter hujusmodi et quasdam alias causas legitimas episcopatui Petragoricensi dudum desideravit cedere, ac pro cessione hujusmodi libera facienda, penes sedem apostolicam per suos speciales nuntios et litteras se asserit sepius institisse, sicque primo ad bone memorie ... archiepiscopum Burdegalensem, metropolitanum suum, litteras felicis recordationis Innocentii pape predecessoris nostri obtinuit, inter alia continentes, ut hujusmodi cessionem reciperet, si expedire videret. Sed quia idem archiepiscopus, tum proprer graves infirmitates suas, tum etiam propter molestias nimias quibus in sua diocesi vexabatur, apostolicum exequi non potuit in hac parte mandatum ; dictus predecessor noster, nimia ipsius episcopi importunitate devictus, bone memorie ... Agennensi episcopo, predecessori tuo, litteras apostolicas sub certa forma direxit, ut ejusdem episcopi Petragoricensis cessionem reciperet, sibique de bonis episcopalbus, juxta sufficientiam facultatum Petragoricensis ecclesie, provisionem congruam assignaret. Postmodum vero quia idem predecessor tuus propter obitum ipsius predecessoris nostri hujusmodi litteris uti nequivit, pie memorie Alexander papa, predecessor noster, ad quem pro parte ipsius episcope Petragoricensis super hoc habitus fuit recursus, super recipienda ipsius cessione ac facienda sibi provisione hujusmodi eidem predecessori tuo semel ac iterum apostolica scripta direxit, ut dictum Petragoricensem episcopum conscientie sue relinquens, ejus cessionem reciperet, si sibi et eidem ecclesie Petragoricensi expedire videret. Porro dicto predecessore tuo id efficere negligente, ac propter hoc eodem Petragoricensi episcopo apostolicam coacto gratiam implorare, prefatus Alexander, predecessor noster, ad importunas preces ipsius episcopi Petragoricensis, quas ei direxit per nuntium et litteras speciales, ipsum super hoc conscientie sue relinquens, venerabili fratri nostro G., patriarche Ierosolimitano, tunc episcopo Agennensi, successori dicti predecessoris tui, dedit per litteras apostolicas in mandates, ut a prefato episcopo Petragoricensi cessionem ipsam sine qualibet difficultate reciperet, ac sibi, juxta formam dictarum litterarum supradicto predecessori tuo directarum, de bonis episcopalibus provideret; provisionem quoque quam sibi de bonis hujusmodi deputaret, ei faceret per se vel per alium observari. Contradictores etc. Nuper siquidem sepedictus Petragoricensis episcopus per suas patentes litteras, quas attente perlectas penes nos duximus retinendas, ac etiam per suum specialem procuratorem sufficiens ad hoc mandatum habentem, apud nos instanter et importune institit, ut cum ipse propter impedimenta fortuitorum casuum, que medio tempore intervenisse noscuntur, suo, prout asserit, irrevocabili super cessione ipsa desiderio remanserit hactenus defraudatus, ejusque labor vacuus fuerit super omnibus litteris supradictis, saltem nos hujusmodi cessionem recipi, ac sibi provisionem ipsam fieri, eamque observari, juxta tenorem dictarum litterarum patriarche directarum eidem, misericorditer faceremus. Nos itaque, devicti ejus precibus importunis, fraternitati tue mandamus, quatinus tam super premissis, quam super aliis causis legitimis, quas idem episcopus pro facienda cessione predicta coram te duxerit proponendas, inquisita diligentius veritate, si de ipsis vel aliqua earum, que sufficiat ad faciendam cessionem ipsam secundum canonicas sanctiones, tibi constiterit, cum ab eo humiliter fueris requisitus, cessionem ipsam vice nostra recipias, ac provisionem hujusmodi, juxta formam litterarum ipsarum ad eundem patriarcham obtentarum, sibi assignes et facias observari. Contradictores, etc. Non obstantibus quibusdam litteris a felicis recordationis Urbano papa, predecessore nostro, super hiis ad venerabilem fratrem nostrum ... episcopum Caturcensem nomine ipsius episcopi Petragoricensis obtentis, maxime cum ipse, sicut asserit, eis ob illam causam uti pretermiserit, quia preter suum assensum impetrate fuerunt. Datum Perusii, XIII kalendas maii, anno primo.