18 novembre 1267

Edition : Edouard Jordan, Les registres de Clément IV (1265-1268) – Recueil des bulles de ce pape publiées ou analysées d’après les originaux des archives du Vatican, 1893, n° 530.

Original : fol. 169 v°, an. III, n° 99.

Copie: http://www.guyenne.fr/ArchivesPerigord/BNF/Tome30/BnF_tome30.htm (fol. 422 r°).

Episcopi Petragoricensis, propter debilitatem corporis cedere cupientis, cessionem admittit, sibi provisionem ecclesie Petragoricensis et abbatie sancti Frontonis Petragoricensis reservans.

P. episcopo Petragoricensi.

Ab olim proprii corporis, qua gravaris, debilitate pensata, et aliarum quamplurium ratione causarum inductus, Petragoricensis ecclesie regimini cedere cupiens, tam apud felicis recordationis Innocentium, Alexandrum et Urbanum, Romanos pontifices, predecessores nostros, quam apud nos etiam, institisti, non sine importune supplicationis instantia, ut cessionem tuam admittere curaremus. Cumque venerabili fratri nostro ... Agennensi episcopo dedissemus nostris litteris in mandatis, ut de hujusmodi causis, quarum pretextu cedere intendebas, veritateplenius inquisita, si de ipsis vel ipsarum aliqua, que ad hoc sufficeret secundum canonicas sanctiones, constaret eidem, cessionem ipsam, cum super hoc esset a te requisitus, vice nostra recipere procuraret ; tandem idem Agennensis episcopus, licet nonnulle de predictis causis, quas duxeras proponendas, sufficienter fuerint coram ipso probate, cessionem tamen non admisit eamdem, sed processum per eum super hoc habitum ad nos remittere procuravit. Denique Bertrando de Malomonte, canonico Lemovicensi, procuratore tuo super hoc specialiter in nostra presentia constituto, et tuo nomine cessionem ipsam a nobis admitti suppliciter postulante, nos eodem processu tuaque instantia importuna pensatis, cessionem eamdem de fratrum nostrorum consilio duximus admittendam, et te a vinculo quo teneris eidem ecclesie absolventes de apostolice plenitudine potestatis, episcopali dignitate tibi nichilominus reservata, provisionem ipsius ecclesie hac vice sedi apostolice, necnon abbatiam secularis ecclesie sancti Frontonis Petragoricensis, quam obtines, collationi sedis ejusdem auctoritate apostolica reservamus. Decernentes ex tunc irritum et inane, si contra reservationem hujusmodi quavis auctoritate secus a quoquam extiterit attemptatum. Datum Viterbii, XIV kalendas decembris, anno tertio.

In eodum modum, capitulo Petragoricensi scribit super eodem argumento ; eisque mandat ne ad electionem aliquam procedant. Datum ut supra.

In eodum modum, episcopo Agennensi scribit super eodem argumento, eique mandat ut eidem P. de bonis Petragoricensis ecclesie provisionem congruam assignari faciat. Datum Viterbii, XIII kalendas decembris, anno tertio.

La copie de la collection Périgord ajoute :

In eodem modo, capitulo Petragoricen. episcopus proprii corporis qua gravatur, debilitate pensata, ut in superiori proxima, verbis competent, mutatis usque attemptatum, ideoque universitati vestre, auctoritate presentium, disctrictius inhibemus, ne hac vice, ad electionem, vel postulationem aliquam procedatis. Nos etiam, sicut decrevimus sic et decernimus irritum et inane, si contra inhibitionem hujusmodi secus contigerit attemptari. Datum ut supra.

In eodem modo, ... episcopo Agennen. &c. Datum Viterbii, XIII kal. decembris, anno III°.