10 mai 1279

Edition : Jules Gay, Les registres de Nicolas III - Recueil des bulles de ce pape publiées ou analysées d’après les manuscrits originaux des archives du Vatican, 1898, n° 567.

Original : Reg. 39, fol. 192, an. II, n° 158.

Copie: http://www.guyenne.fr/ArchivesPerigord/BNF/Tome30/BnF_tome30.htm (fol. 455 r°)

Ecclesie Jerosolimitane, quam sedi apostolice reservavit, Heliam tunc episcopum Petragoricensem in patriarcam preficit; ecclesiam quoque Acconnensem secundum exemplum predecessorum suorum eidem committit, donec ecclesia Jerosolimitana bona sua recuperaverit.

Venerabili fratri Helie patriarche Jerosolimitano. Super electione sua. Ad providam apostolice. Decebat quidem nos circa statum ecclesie Jerosolimitane dum vacationis incomoda deplorabat tanto vigilantius cogitare quanto ipso majori corruscat privilegio sanctitatis et donorum perceptione celestium dinoscitur amplius insignita, ut ibidem personam substitueremus ydoneam que digne competeret ad ipsius ecclesie regimen assumendum et ad illius exaltationis augmenta sua totaliter studia deputaret. Sane dudum eadem ecclesia per obitum bone memorie Th. Patriarche Jerosolimitani pastoris solatio destituta, dilecti filii capitulum ipsius ecclesie pro futuri substitutione pastoris prout est moris convenientes in unum venerabilem fratrem nostrum ... archiepiscopum Neapolitanum in Jerosolimitano patriarcha unanimiter postularunt et nobis hujusmodi postulatio extitit presentata, qua non vitio persone sed ex certis causis aliis non admissa provisionem ejusdem ecclesie illa vice nobis duximus reservandam. Et postmodum de dilecto filio fratre Johanne priore generali ordinis fratrum Predicatorum providimus ecclesie memorate, qui sub pallio paupertatis quam in humilitate spiritus considerans quam preesse aliis preminentia dignitatis se super hoc nobis humiliter excusavit et petiit a provisione hujusmodi se absolvi. Nos autem excusationem hujus admittentes ac reservantes nobis similiter provisionem ecclesie supradicte inter alios, quos pensatis omnibus diligenter que in hujusmodi pensari negotio debuerunt eidem ecclesie utiles esse comperimus, ad te tunc episcopum Petragoricensem apud sedem apostolicam a longis retro temporibus laudabiliter conversatum et in magnis et arduit commissis tibi per predecessores nostros Romanos pontifices et nos etiam negotiis experientia comprobatum, ex cujus laudabilibus studiis et preteritorum consideratione spec nobis inducitur de futuris, specialiter mentis nostre convertimus aciem, nec adicere tuis humeris sub multorum laborum sarcina fatigatis onera dubitamus. Nam jugum Domini tibi sicut credimus est suave, nec onus ejus reputas nisi leve. Sperantes itaque quod ipsa ecclesia per tue circumspectionis industriam, cum existas per opera utilia et exempla laudabilia fructuosus et ex data prudentia tibi divinitus scias tum et possis fructus utiles in domo Domini germinare, Deo propitio relevabitur a noxiis et salubria suscipiet incrementa, te de fratrum nostrorum consilio absolvimus a vinculo quo Petragoricensi teneris ecclesie et ad memoratam ecclesiam Jerosolimitanam de apostolice potestatis plenitudine transferentes, ipsi te in patriarcham preficimus et pastorem. Cum autem felicis recordationis Urbanus papa IV primo de fratrum suorum consilio ecclesiam Acconensem, de qua bone memorie magistrum Florentium Arelatensem archiepiscopum ad Arelatensem ecclesiam tunc vacantem duxerat transferendum, patriarche Jerosolimitano qui erit pro tempore fore decreverit committendam et ab eo una cum dicta Jerosolimitana ecclesia tamdiu in spiritualibus et temporalibus gubernandam, donec eadem Jerosolimitana ecclesia bonis ejus recuperatis possessionem habuerit eorundem, et postmodum etiam pie memorie Gregorius papa decimus predecessor noster de fratrum suorum consilio eandem ecclesiam Acconensem eidem Th. Patriarche predecessori tuo duxerit committendam, prout in regestris ipsorum predecessorum nostrorum plenius continetur, nos eandem ecclesiam Acconnensem similiter nunc etiam vacantem tue circumspectioni committimus per te una cum dicta Jerosolimitana ecclesia in omnibus gubernandam, donec eadem Jerosolimitana ecclesia bonis suis recuperatis de adepta ipsorum possessione letetur. Quocirca ... Datum Rome apud Sanctum Petrum, VI idus maii, anno secundo.

In eundem modum, capitulo ecclesie Jerosolimitane.

In eundem modum, clero civitatis et diocesis Jerosolimitane.

In eundem modum, capitulo Acconensi.

In eundem modum, populo civitatis et diocesis Jerosolimitane.

In eundem modum, populo Acconensi.

In eundem modum, universis vassallis ecclesie Jerosolimitane.

In eundem modum, suffraganeis ecclesie Jerosolimitane. Datum ut supra.