24 octobre 1284

Edition : Chartularium Universitatis Parisiensis, Henri Denifle, t. 1, 1889, n° 516, p. 623.

Pas mentionné dans les registres de Nicolas III de Jules Gay.

Pas mentionné dans Potthast.

516. Gaufridus presbyter cardinalis decano et capitulo Paris. notum facit quidquid summus pontifex in causa ab Universitate contra cancellariam Paris. Philippum de Thoriaco mota definiverit.

1284, octobris 24, apud Urbem Veterem.

Viris venerabilibus et discretis in Christo carissimis decano et capitulo Parisiensi Gaufridus (1) miseratione divina tituli S. Susanne presbyter cardinalis et cum dilectione sincera paratam ad eorum beneplacita voluntatem. Statum negotii quondam venerabilis viri cancellarii Parisiensis (2) vobis aperire volentes, discretioni vestre tenore presentium intimamus quod a sanctissimo patre ac domino nostro Martino divina providentia summo pontifice de consilio cardinalium ordinatum erat, quod omnes licentie ab Universitate Parisiensi quibuscunque personis de facto concesse in ipsa curia revocarentur, et tam recipientes hujusmodi licentias, quam etiam concedentes easdem, canonice et graviter punirentur. Item quod quicquid contra jurisdictionem dicti cancellarii extitit attentatum, prout prius in curia revocaretur. Item quod doctores Universitatis non possint cancellarium eundem ad congregationes suas compellere, sed eum debebunt rogare, et si ire voluerit, bene quidem, si vero ire noluerit, ipsum coercere non poterunt in aliquo vel punire (3). Alii vero articuli, de quibus inter ipsum cancellarium et Universitatem contenditur, qui non sunt ita certi, qui ex parte cancellarii et a procuratore Universitatis dati fuerunt, committi debebunt venerabilibus patribus dominis G. (4) et R. (5) Ambianensi et Petrocoricensi episcopis et discreto viro magistro Henrico de Gandavo, archidiacono Tornacensi. Et super iis omnibus precepit dominus noster papa notam (6) fieri. Sed dicto cancellario Philippo nuper in curia, secundum quod Deo placuit, viam universe carnis ingresso (7), super ipso negotio locuti sumus cum domino papa, qui nobis respondit quod in ipso negotio ulterius non procedet, quousque novus cancellarius (8) per seipsum vel procuratorem idoneum in curia dictum negotium prosequatur. Et cum negotium ipsum sit ipsius ecclesie et domini episcope negotium speciale, expediens videtur quod vos una cum dicto episcopo in curia aliquem procuratorem idoneum constituere curaretis ad ipsum negotium persequendum. Melius tamen esset quod novus cancellarius ad curiam veniret personaliter; et damus pro certo quod negotium cito expediretur. Si vero non venerit, negotium ipsum poterit in curia diu stare. Valete, viri discreti, per tempora longiora, et oretis pro nobis et orari faciatis. Datum apud Urbem Veterem, die martis ante festum apostolorum Simonis et Jude.

Hemeraeus, De acad. Paris., p. 80. – Bulneus, III, 464. – Hanc epistolam ad an. 1284 esse referendam bene monstravit V. Le Clerc in Hist. litt. de la France, XXI, 821.

(1) I. e. Gaufridus de Barro. Cf. supra n° 415, n. 2.

(2) Cf. supra n° 515.

(3) Vide infra, n° 528, ubi haec omnia multo extensius narrantur.

(4) Guillelmo de Matiscone.

(5) Raimundo d’Auberoche. Cf. supra n° 498, n. 6.

(6) I. e. litteras minutas. Revera decisiones Martini IV exstabant tantum in minutis, non in authenticis bullatis. Vide infra n° 528.

(7) Philippus de Thorince obiit 1284; quo vero mense incertum est.

(8) Philippo in officio cancellari magister Nicolaus de Nonancuria an. 1284 successit, qui in epistolis Honorii IV interdum nominatur. Cf. infra n° 522, 528.