5 décembre 1289

Edition : Ernest Langlois, Les registres de Nicolas IV (1288-1292). Recueil des bulles de ce pape publiées ou analysées d’après les manuscrits originaux des archives du Vatican, 1886-1891, n° 2088.

Original : Reg. 44, c. 818, f. 290 r°.

Copie : Laporte du Theil, II, 399.

Copie : Collection Périgord, vol. 30, fol. 486 r°

Sainte-Marie-Majeure, 5 décembre 1289

Contra clandestina matrimonia.

Venerabili fratri ... episcopo Petragoricensi.

Ex parte venerabilis fratris nostri Raymundi, episcopi Caturcensis, fuit propositum coram nobis quod nonnulli religiosi exempti sue civitatis et diocesis nonnunquam viros et mulieres earumdem civitatis et diocesis in eorum ecclesiis et capellis admittunt ad clandestina matrimonia contrahenda, faciendo ipsis taliter contrahentibus missarum sollemnia celebrari contra canonicas sanctiones, sicque frequenter contingit quod tales in gradibus prohibitis aliasque illicite per contractus hujusmodi conjunguntur, in suarum dispendium animarum et scandalum plurimorum. Quare pro parte ipsius episcopi fuit nobis humiliter supplicatum ut providere super hoc de salubri remedio paterna sollicitudine curaremus. Quocirca fraternitati tue per apostolica scripta mandamus quatenus, si est ita, ex parte nostra districtius inhibere procures ne de cetero per eosdem religiosos talia presumantur, eos qui contra fecerint juxta sanctiones hujusmodi puniendo. Presentibus post quinquennium minime valituris. Datum Rome, apud Sanctam Mariam Majorem, nonis decembris, anno secundo.