9 juin 1303

Edition : Georges Digard, Maurice Faucon, Antoine Thomas, Robert Fawtier, Les registres de Boniface VIII - Recueil des bulles de ce pape publiées ou analysées d’après les manuscrits originaux des archives du Vatican, 1884-1939, n° 5303 (CLXXXIII).

Original : Reg. 50, fol. 349 v°.

Mandatur citari quidam de diocesibus Xanctonensi et Pictavensi.

Venerabili fratri ... episcopo, et dilecto filio ... decano Xanctonensi.

Ad malignantium corrigendos excessus manum nos decet Apostolice correctionis apponere, ne, si quod absit, remaneant impuniti, in exempli pernitiem transeant aliorum. Accedens siquidem ad presentiam nostram, dilectus filius Petrus Lupi, prior prioratus castri de Compuyaco, ordinis sancti Benedicti, Xanctonensis diocesis, gravi nobis conquestione monstravit, quod Petrus Vigerii, subdiaconus, tunc castellanus dicti castri, Johannes Munaudi, et Guillelmus Talhandarii, Guillelmus et Elyas de Barreto fratres, Johannes de Ulmo, clerici, Gaufridus de Perniaco, Symonetus et Michael Anglici, Guillelmus Gascherelli, Petrus Guineberti, Petrus de Camera, Aymericus Perrerii, Arnaudus Balandi, Johannes Arnulphi, Johannes de Mahentia, Laurentius de Bocketo, et Iterius Aysse, Petrus Odoberti senior, Petrus Pererii et Aymericus Leucardi, Elyas de Metulo, Rampnulphus Natalis, Robertus Mercerii, Guillelmus Clementis et Johannes Mineti, laici, dicte ac Pictvensis dioecesium, ad prioratum predictum cum multitudine armatorum hostiliter accedentes, ac domos dicti prioratus, fractis illarum ostiis, violenter intrantes, Petrum de Termis et quondam Hugonem de Gardemonga, monachos dicti prioratus, ac quondam Petrum de Biliaco, clericum, familiarem dicti prioris, tunc ante altare Sancte Marie in ipsius prioratus ecclesia existentem, manibus injectis in eos, Dei timore postposito, temere violentis, ausu sacrilego capere, ipsosque captos, collo dicti clerici fune ligato, ad dicto castrum ducere, eos inhumaniter verberando, spiritu ducti diabolico, presumpeserunt, ibique rasis eorum capitibus, ne signa clericalis caracteris apparerent, dictoque clerico, qui clericale privilegium et immunitatem ecclesiasticam allegabat, suspendio tradito, prefatos monachos monachali habitu exuerunt. Quos deinde, laicalibus indumentis indutos, eorum manibus et pedibus adeo stricte ligatis, quod sanguis inde fluebat, ad castrum de Villabois, predicte Xanctonensis et Petragoricensis diocesium, captivos ducentes, illos demum in dicto castro de Villebois (sic), diro carceri manciparunt, et tam duris tormentis et angustiis afflixerunt eosdem, quod idem Hugo ex tormentorum duritia post modicum temporis expiravit, propter que castra predicta juxta quandam constitutionem concilii (1) Burdegalensis, per archiepiscopum Burdegalensem, loci metropolitanum, et ejus suffraganeos editam, ecclesiastico interdicto subjacere dicuntur, iidem quoque subdiaconus, clerici et laici, quosdam equos dicti prioris ab eodem prioratu abducentes, pannos lancos et lineos, lectos et alia quedam ex bonis dicti prioratus apud prioratum eundem existentia destruxerunt, et alia ex ipsis bonis fecerunt exinde nequiter asportari, alias ipsis priori et prioratui dampna gravia, injurias et violentias multipliciter irrogando. Quare dictus prior nobis humiliter supplicavit, ut, cum ipse contra dictos sacrilegos, propter eorum potentiam et malitiam, non confidat posse in illis partibus super hiis justitie consequi complementum, providere sibi super hoc de oportuno remedio dignaremur. Cum autem premissa, si veritate nitantur, in gravem divine majestatis offensam, clericalis ordinis et religionis contemptum, ac conculcationem ecclesiastice libertatis redundare noscantur, nos, ea nolentes, prout etiam nec debemus, silentio preterire, ne illorum impunitas aliis prebeat audatiam delinquendi, discretioni vestre, de qua fiduciam gerimus in Domino specialem, per apostolica scripta mandamus, quatinus vos vel alter vestrum, per vos vel alium seu alios, prenominatos subdiaconum, clericos et laicos, ex parte nostra, peremptorie citare curetis, ut infra XL dierum spatium post citationem hujusmodi compareant personaliter coram nobis, mandatis nostris et beneplacitis in hac parte plenarie parituri, ac alias facturi et recepturi super hiis quod justitia suadebit. Diem vero citationis hujusmodi et fermam et quicquid inde feceritis nobis per vestras litteras, harum seriem continentes, fideliter intimare curetis, ac nichilominus hujusmodi interdictum, si de illo vobis constiterit, faciatis in eisdem castris usque ad satisfactionem condignam, appellatione remota, inviolabiliter observari. Datum Anagnie, V id. junii, anno nono.

(1) Ms : consilii.