2 janvier 1119

Gelase II confirme les privilèges et possessions de Saint-Sernin de Toulouse.

Mention de Saint-Avit et Saint-Cyprien.

Edition : C. Douais, Cartulaire de l'abbaye Saint-Sernin de Toulouse (844-1200), appendice I, p. 473 et suiv., bulle n° 5, 1887

Original : Bulla in originali in Archives de la Haute-Garonne, fonds de Saint-Sernin, liasse III, titre 6^e.

Gelasius episcopus, servus servorum Dei dilectis filiis Raimundo, abbati, et ejus fratribus in aecclesia Beati Saturnini, quae in Tolosano burgo sita est, regularem vitam professis tam presentibus quam futuris, in perpetuum. Justum et condecens est ut que a catholicis patribus rationabiliter constituta sunt illibata serventur. Ea propter vite canonice ordinem sicut a predecessoribus nostris sancte memorie Urbano et Paschali pontificibus in vestra ecclesia constitutus est, nos quoque sic in posterum permanere decreti presentis auctoritate sancimus. Ea etiam que a predictis pontificibus ecclesie vestre concessa sunt, nos quoque concedimus, ut, videlicet, obeunte te nunc ejusdem loci abbate vel tuorum quolibet successorum nullus ibi qualibet subreptionis astutia seu violentia preponatur, nisi quem fratres communi consensu vel fratrum pars sanioris consilii secundum Dei timorem providerit regulariter eligendum. Si qui sane clerici cum episcoporum suorum licentia conversionis gratia locum ipsum adierint, abbati liberum sit preter episcopi Tolosani contradictionem suscipere, ut nulla eis erga suum abbatem inobedientie causa et superbie relinquatur. Porro abbatie decanie, sacristie, operis ecclesie, capisticole, et cetera ecclesie vestre bona oblationes altaris et ecclesie, archidiaconatus dignitatem et censum ipsius archidiaconatus, videlicet XL solidos et XVIII de illa parte archidiaconatus quam milites violenter tenere consueverant, leddam etiam a festo Omnium Sanctorum usque ad festum sancti Saturnini, et censum quem episcopus in festivitate beati Saturnini ex eadem ecclesia accipere solitus erat, sicut Amelius, episcopus, donavit vobis concedimus et confirmamus. Similiter ecclesiam de Merglos et omnes ecclesias de Siger et Sahos, cum omnibus ad eas pertinentibus; cimiterium similiter, sicut in episcopi et canonicorum Sancti Stephani cyrographo continetur; candelas cereas quas Raimundus, Tolosanus comes, in ecclesie dedicatione presente domno Urbano papa, abdicavit, ne quis ulterius exigat interdicimus. Prohibemus etiam ne quis ejusdem ecclesie claustrum violenter insiliat aut infra id rapinam aut injuriam audeat cuiquam irrogare, et ne quis achiepiscopus, vel episcopus, sine nostra aut legati nostri audientia, interdictionis vel excommunicationis in locum vestrum audeat proferre sententiam: Preterea ecclesiam de Artaxona, abbatias quoque Sancti Aviti, Sancti Cypriani, et preposituram Viganiensis ecclesie et ecclesiam Sancte Marie de Landarror, et ecclesiam Sancti Georgii, et Blaniacum et ecclesiam de Mascarono, et ecclesiam Sancti Saturnini de Tauro, et ecclesiam Sancti Quintini, et ecclesiam Sancti Saturnini de Puliaco, et ecclesiam Sancte Marie de Martiribus, et Sanctam Constantiam et ecclesiam Sancte Marie de Asinag, et ecclesiam de Cellas et Sancti Petri de Livrag quicquid etiam eadem ecclesia jure possidet, sive in futurum, Deo annuente, juste atque canonice poterit adipisci, vobis vestrisque successoribus regulariter viventibus confirmamus. Si qua igitur in futururn ecclesiastica secularisve persona, hanc nostre constitutionis paginam sciens, contra eam temere venire temptaverit, secundo tertiove commonita si non satisfactione congrua emendaverit, potestatis honorisque sui dignitate careat, reamque se divino judicio existere de perpetrata iniquitate cognoscat, et a sacratissimo corpore ac sanguine Dei et Domini Redemptoris nostri Jhesu Christi aliena fiat, atque in extremo examine districte ultioni subjaceat. Cunctis autem eidem ecclesie Justa servantibus sit pax Domini nostri Jhesu Christi, quatenus et hic fructum bone actionis percipiant, et apud districtum judicem premia eterne pacis inveniant. Amen. Amen. Amen.

Ego Gelasius, ecclesie catholice episcopus, subscripsi signum manus mee Deus in loco sancto suo.
Datum Valentie per manum Grisogoni, sanctae Romanae aecclesiae diaconi cardinalis, IIII non. januarii, indictione XII, Dominice Incarnationis anno M°.C°. XVIIII°, pontificatus autem domini Gelasii secundi pape anno primo.