1^er avril 1142

Confirmation par le pape Innocent II des possessions de l’abbaye de Grand-Selve.

Mention du lieu Scenzalas en Périgord. (Non encore identifié avec certitude; peut-être Sinzele, commune de Saint-Cyprien).

Référence : 8219 (5848)

Monasterium S. Mariae Grandis-silvae tuendum suscipit et ejus possessiones ac jura confirmat, petente Bertrando abbate. Gall. Chr., XIII, Instr., p. 18, Migne, 179, p, 588. — « Apostolici moderaminis ».

Edition : Gallia christiana, XIII, Nov. ed., Instrumenta, p. 18.

Edition : Patrologie de Migne, Innocentius II epistolae et privilegia

Innocentius, servus servorum Dei, dilectis filiis Bertrando abbati monasterii Grandis-Silvae ejusque fratribus, tam praesentibus quam futuris, regularem vitam professis in perpetuum.

Apostolici moderaminis clementiae convenit religiosos diligere et eorum loca pia protectione manire. Dignam namque et honestati conveniens esse cognoscitur ut qui ad ecclesiarum regimen assumpti sumus, eas et a pravorum hominum nequitia tueamur et apostolicae sedis patrocinio foveamus. Eapropter, dilecti in Domino filii, vestris justis postulationibus clementer annuimus, et praefatum beatae Dei Genitricis semperque virginis Mariae monasterium, quod in Tolosano episcopatu situm est, sub beati Petri et nostra protectione suscipimus et praesentis scripti patrocinio communimus. Statuentes ut ordo monasticus secundum beati Benedicti regulam et institutionem fratrum Cisterciensium perpetuis ibi temporibus inviolabiliter conservetur. Praeterea quascunque possessiones, quaecunque bona idem monasterium inpraesentiarum juste et canonice possidet, aut in futurm concessione pontificum, largitione regum vel principum, oblatione fidelium, seu aliis justis modis, Deo propitio, poterit adipisci, firma vobis vestrisque successoribus et illibata permaneant. In quibus haec propriis duximus exprimenda vocabulis; locum scilicet Grandem-Silvam, cum omnibus quae ad ipsum pertinent, qui locus infra has quatuor ecclesias videlicet Riclercellam, Pulchrum-Montem, Bolliacum, et Sanctum Germanum, situs est. Grangiam de Cobirac, grangiam de Combaroger. Et ultra fluvium Garonnae, grangiam de Baniols, grangiam de Laseta. In alio loco sub castro de Caraman, grangiam de Salet. Praeterea in pago Narbonensi locum Fontisfrigidi cum decimis et primitiis et omnibus pertinentiis suis, quem Aimericus vicecomes Narbonensis ad aedificandam ibi abbatiam pro redemptione animae suae praedicto abbati et fratribus in perpetuum contulit. In pago Petragoricensi locum de Scenzalas cum decimis et primitiis et omnibus quae ad eum pertinent, sane laborum vestrorum quos propriis manibus aut sumptibus colitis, sive de nutrimentis vestrorum animalium, nullus omnino clericus vel laicus decimas a vobis exigere praesumat. Obeunte vero te nunc ejusdem loci abbate, vel tuorum quolibet successorum, nullus ibi qualibet subreptionis astutia seu violentia praeponatur; sed liceat vobis communi consilio vel partis consilii sanioris secundum Dei timorem et beati Benedicti regulam, absque ultius contradictione abbatem eligere. Decernimus ergo ut nulli omnino hominum liceat praefatum monasterium temere perturbare, aut ejus possessiones auferre, vel ablatas retinere, minuere, seu aliquibus vexationibus fatigare; sed omnia integra conserventur, eorum pro quorum gubernatione et sustentatione concessa sunt, usibus omnimodis profutura. Si qua igitur in futurum ecclesiastica saecularisve persona, hujus nostrae constitutionis paginam sciens, contra eam temere venire tentaverit, secundo tertiove commonita, si non satisfactione congrua emendaverit, potestatis honorisque sui dignitate careat, reamque se divino judicio existere de perpetrata iniquitate cognoscat, et a sacratissimo corpore ac sanguine Dei et Domini Redemptoris nostri Jesu Christi aliena fiat, atque in extremo examine districtae ultioni subjaceat. Cunctis autem eidem loco justa servantibus sit pax Domini nostri Jesu Christi, quatenus et hic fructum bonae actionis percipiant, et apud districtum judicem praemia aeternae pacis inveniant. Amen, amen, amen.

Ego Innocentius Catholicae Ecclesiae episcopus.

Ego Gregorius Gerardus.

Ego Conradus Sabiniensis episcopus, diaconus cardinalis Sanctorum Sergii et Bacchi.

Ego Albericus Ostiensis episcopus.

Ego Guido diaconus cardinalis Sanctorum Cosmae et Damiani.

Ego Guido sanctae Romanae Ecclesiae indignus sacerdos.

Ego Gerardus diaconus cardinalis Sanctae Mariae in Dominica.

Ego Octavianus diaconus cardinalis Sancti Nicolai in Carcere.

Ego Guido sanctae Romanae Ecclesiae diaconus cardinalis.

Guizo presbyter cardinalis tituli Sanctae Caeciliae.

Datum Laterani per manum Gerardi sanctae Romanae Ecclesiae presbyteri cardinalis et biblothecarii, Kalendis Aprilis, indictione quinta, Incarnationis Dominicae anno 1142, pontificatus vero domini Innocentii II anno XIII.