1181

Henri, évêque d'Albano, légat du Siège apostolique, juge un différend entre l'abbé Gerald et moines de Dalon d’une part, et l'abbesse Aldeburgis et les moniales de Notre-Dame de Saintes d’autre part.

Edition: Papsturkunden in Frankreich; VI - Auvergne, Poitou, Périgord, Angoumois, Saintonge, Marche und Limousin, n° 49, Acta Romanorum Pontificum, Wilhelm Wiederhold, 1911-1913.

Copie : Coll. Baluze, vol. 375, f. 25, ex cartulario Dalonensi, Bibl. Nat., Paris

Henricus Dei gratia Albanensis episcopus, apostolice sedis legatus dilectis in Christo filiis Geraldo abbati et fratribus Dalonensibus et dilectis in eodem filiabus Aldeburgi abbatisse sancte Marie Xanctonensis et sororibus ejusdem ecclesie salutem et pacis tranquillitatem. Vobis apud Xantonas in nostra presentia constitutis et tam super decimis laborum quos propriis manibus aut sumptibus vos, fratres Dalonis, in loco qui dicitur de Toschis excolitis et super decimis vinearum et salinarum quas in eodem loco habetis, quam super decimis de nutrimentis animalium vestrorum, quas tu, dilecta in Domina filia sancte Marie Xanctonensis, et sorores tue ab abbate Dalonensi fratribusque suis nomine ecclesie vestre petebatis, diu agitatum esset atque rationes vestras et allegationes hinc inde diligentius intellexissemus, placuit utrique parti amicabili potius compositione litem ipsam terminari quam causam protrahere ad laborum et expensarum enormitatem. Compromittentes itaqne in nos et venerabiles fratres nostros Xanctonensem et Baionensem episcopos et dilectos filios nostros R(anulfum) videlicet abbatem sancti Eparchii, R. archidiaconum Xanctonensem et nobilem virum Fulconem de Mastaz, tu, predicte fili abbas Dalonensis, pro te et fratribus tuis et tu, abbatissa Xanctonensis, pro te et sororibus tuis, data fide in manu ejusdem Xanctonensis episcopi, sponte firmastis, quod nostrum et earundem discretarum personarum arbitrium super memorata querela susciperetis et ipsum perpetuis temporibus illibatum servaretis. Nos autem cum predictis reverendis personis de querimoniis prelibatis consilium habentes et diutius deliberantes, ita inter vos statuimus, quod abbas et fratres Dalonenses deinceps loco omnium prescriptarum decimarum quas tu, abbatissa Xanctonensis, et sorores tue ab ipsis exigebatis, unum sextarium frumenti et alterum mixture ad mensuram terre de Marennia et duos modios vini et duos modios salis in festo Omnium sanctorum in domo de Toschis prioratui sancti Saturnini de Marennia, qui ad monasterium sancte Marie Xanctonensis pertinere dinoscitur, annuatim persolvent nec ultra hoc moniales, que pro tempore fuerint, ab abbate et fratribus Dalonensibus occasione prescriptarum decimarum quicquam exigant nec de cetero illos exinde injuste molestare presumant. Veruntamen si abbas et fratres monasterii Dalonensis in territoriis ad jus sive decimationes sancte Marie Xantonensis pertinentibus possessiones aliquas acquisierint, preter illas quas tempore hujus compositionis possidebant, decimas sicut alii coloni terre locis earum ad que pertinebant, prestare non contradicant. Pretaxatam vero compositionem de providentia et arbitrio nostro et predictarum commendabilium personarum de communi partium assensu celebratam auctoritate domini pape et nostra confirmamus et presentis scripti patrocinio communimus. Statuentes ut nulli omnino hominum liceat contra prelibatam compositionem venire vel ei aliquatenus contraire. Quod si quis ausu temerario facere presumpserit, indignationem omnipotentis Dei et beatorum Petri et Pauli apostolorum ejus et domini pape et nostram se noverit incursurum. Actum anno ab incarnatione Domini M C L XXXI.